आदर्शनगरको अवैध गोदाममा छापा मार्दा तस्करको आक्रमण, ३ सशस्त्र प्रहरी घाइते

काठमाडौं ।  अवैध गोदाममा सशस्त्र प्रहरीले छापा मार्ने क्रममा तस्कर समुहले आक्रमण गर्दा ३ जना सशस्त्र प्रहरी घाईते भएका छन् ।

आज पर्साको वीरगंज महानगरपालिका–१० आदर्शनगरस्थित मदन प्रसाद गुप्ताको घरमा अवैध रुपले गोदाम गरी राखिएको कपडा बरामद गर्ने क्रममा झडप भएको सशस्त्र प्रहरीले जानकारी दिएको छ।

सशस्त्र प्रहरी बल नेपाल नं. १३ गण पर्सा, सीमा सुरक्षा गुल्म बिरगंज र बिरगंज भन्सार कार्यालयको संयुक्त टोलीले आज बिहान गोदाममा छापा मारेर अवैध रुपमा भण्डार गरी राखेको ७ लाख मुल्य बढिको कपडा बरामद गरेको सशस्त्र प्रहरी प्रधान कार्यालयले जनाएको छ।

कपडा बरामदपछि तस्कर समुह आक्रमणमा उत्रिएका थिए । तस्कर समुहको ढुंगामुढा प्रहारबाट सशस्त्र प्रहरी बल नेपालको एउटा वानटन र एउटा स्कार्पियो गाडीमा समेत क्षती पुगेको छ भने ३ जना सशस्त्र प्रहरी घाईते भएका छन् । बरामद सामनलाईलाई सम्बन्धित निकायमा बुझाउने प्रक्रियामा रहेको सशस्त्र प्रहरी प्रधान कार्यालयले जानकारी दिएको छ।