दाङका घुम्ती क्षेत्रमा सवारी दुर्घटना न्यूनीकरण गर्न कन्भेक्स मिरर जडान

दाङ । समुदाय–प्रहरी साझेदारी अवधारणा अनुरूप जिल्ला ट्राफिक प्रहरी कार्यालय दाङको समन्वय तथा सडक डिभिजन कार्यालय घोराही दाङको सहयोगमा सवारी दुर्घटना न्यूनीकरण गर्ने उद्देश्यले विभिन्न घुम्ती तथा मोडहरूमा कन्भेक्स मिरर जडान गरिएको छ।

लमहीको अर्जुन खोलादेखि घोराहीको बबई पुलसम्मका विभिन्न जोखिमयुक्त स्थानहरूमा ९ थान कन्भेक्स मिरर राखिएको जिल्ला ट्राफिक प्रहरी कार्यालय दाङले जानकारी दिएको छ। ती क्षेत्रमा अत्यधिक घुम्ती तथा अन्धा मोडहरू रहेका कारण सवारी दुर्घटनाको संख्या बढी हुने गरेको जनाइएको छ।

विशेषगरी तीव्र गतिमा सवारी सञ्चालन, दृश्यता कम हुने अवस्था र साँघुरा मोडका कारण दुर्घटनाको जोखिम उच्च रहने गरेको कार्यालयले जनाएको छ। कन्भेक्स मिरर जडानपछि सवारी चालकलाई विपरीत दिशाबाट आउने सवारी साधन देख्न सहज हुने र दुर्घटना न्यूनीकरणमा सहयोग पुग्ने विश्वास लिइएको छ।

आगामी दिनमा समेत दुर्घटना बढी हुने सम्भावित स्थानहरूको पहिचान गरी आवश्यक पूर्वाधार विस्तारलाई निरन्तरता दिइने जिल्ला ट्राफिक प्रहरी कार्यालय दाङले जनाएको छ।