सल्यानबाट दाङ आउँदै गरेको जिप २५० मिटर तल खस्यो, चालकको घटनास्थलमै मृत्यु, ३ जना घाइते

दाङ । सल्यानबाट दाङ आउँदै गरेको जिप सडकदेखि २५० मिटर तल खसेर दुर्घटना  हुँदा चालकको घटनास्थलमै मृत्यु भएको छ। दुर्घटनामा  आमा–छोरीसहित तीन जना घाइते भएको प्रहरीले जानकारी दिएको छ।

आज बिहान भएको दुर्घटनामा रुकुम पूर्वको सिस्ने गाउँपालिका–४ अमलाचौर निवासी ३० वर्षीय जिप चालक विजय विश्वकर्माको घटनास्थलमै मृत्यु भएको प्रहरीले जनाएको छ। सल्यान प्रहरीका प्रवक्ता प्रहरी निरीक्षक देवराज भट्टराईका अनुसार दुर्घटनामा घाइते हुनेमा सिस्ने–४ की ३८ वर्षीया ललिता केसी, सिस्ने–२ की २२ वर्षीया सुष्मी रोका र उनकी २ वर्षीया छोरी सफलता केसी रहेका छन्।

ललिताको अवस्था मध्यम रहेको छ भने आमा–छोरीको अवस्था सामान्य रहेको बताइएको छ।

इलाका प्रहरी कार्यालय लुहामका प्रमुख प्रहरी निरीक्षक सोम घर्ती मगरका अनुसार दुर्घटनाका क्रममा आमा र छोरी गाडीबाट हुत्तिएर सडक छेउमै खसेकाले ज्यान जोगिएको हो। ललिता केसी भने करिब २० मिटर तल भीरमा खसेकी थिइन्। चालक विश्वकर्मा गाडीसँगै तल खसेका थिए।

घाइतेहरूलाई कपुरकोटमा प्राथमिक उपचारपछि थप उपचारका लागि दाङको तुलसीपुरस्थित राप्ती प्रादेशिक अस्पताल पठाइएको छ।

दुर्घटना सल्यानको कपुरकोट गाउँपालिका–३ चोरखोला नजिकै बिहान करिब साढे ५ बजे भएको हो। रुकुम पूर्वबाट दाङतर्फ जाँदै गरेको ग १ ज ५६६१ नम्बरको बोलेरो पिकअप जीप करिब २५० मिटर तल भीरमा खसेको प्रहरीले जनाएको छ।

प्रारम्भिक अनुसन्धानका क्रममा सडकमा घुम्ती कम रहेको र चालक निदाएको हुनसक्ने आशंका गरिएको छ। घटनाबारे थप अनुसन्धान भइरहेको प्रहरीले जनाएको छ।