विभिन्न जिल्लामा भएका दुर्घटनामा ८ जनाको मृत्यु

काठमाडौं । देशका विभिन्न जिल्लामा भएका छुट्टाछुट्टै सवारी दुर्घटनामा आठ जनाले ज्यान गुमाएका छन्। प्रहरीका अनुसार दुर्घटनामा परेका अन्य केही व्यक्ति घाइते भएका छन् भने सम्बन्धित सवारी चालकहरूलाई नियन्त्रणमा लिएर अनुसन्धान अघि बढाइएको छ।

धनुषाको मिथिला नगरपालिका–१० स्थित लालगढ चोकमा प्रदेश २–०२–००१ ख ३३९९ नम्बरको टिपर र मधेश प्रदेश ०२–००८ प ०४६४ नम्बरको मोटरसाइकल आपसमा ठोक्किँदा २७ वर्षीय अजय विश्वकर्माको मृत्यु भएको हो। गणेशमान चारनाथ नगरपालिका–४ बिरेन्द्रबजार निवासी विश्वकर्मा गम्भीर घाइते भएका थिए। उनलाई मोडल अस्पताल लालगढमा उपचारका लागि लगिए पनि चिकित्सकले मृत घोषणा गरेका हुन्। मोटरसाइकलमा सवार अर्का एक जनाको उपचार जारी छ भने टिपर चालक प्रहरी नियन्त्रणमा छन्।

यस्तै, कास्कीको पोखरा महानगरपालिका–६ मा बीएए १५८२ नम्बरको कार अनियन्त्रित भई दुर्घटना हुँदा २४ वर्षीय अदित गुरुङको ज्यान गएको छ। गम्भीर घाइते गुरुङलाई गण्डकी मेडिकल कलेजमा उपचारका क्रममा मृत घोषणा गरिएको हो। सो दुर्घटनामा घाइते अर्का एक जनाको उपचार भइरहेको छ। कार चालकलाई पनि प्रहरीले नियन्त्रणमा लिएको जनाएको छ।

कपिलवस्तु नगरपालिका–४ मा दुई मोटरसाइकल एकआपसमा ठोक्किँदा १८ वर्षीय सोनु कोरीको मृत्यु भएको छ। गम्भीर घाइते उनलाई जिल्ला अस्पताल तौलिहवामा उपचारका लागि पुर्‍याइएको थियो। उपचारकै क्रममा उनको निधन भएको हो। अन्य घाइतेहरूलाई भैरहवास्थित अस्पतालमा राखेर उपचार भइरहेको छ।

मकवानपुरको हेटौंडा उपमहानगरपालिका–५ पिप्लेमा सडक किनारामा रोकेर राखिएको ट्रकमा मोटरसाइकल ठोक्किँदा ३६ वर्षीय सुवास थिङको ज्यान गएको छ। उनलाई हेटौंडा अस्पतालमा उपचारका क्रममा मृत घोषणा गरिएको प्रहरीले जनाएको छ। ट्रक चालकलाई प्रहरीले नियन्त्रणमा लिएर सोधपुछ गरिरहेको छ।

त्यसैगरी, ललितपुरको कोन्जोसोम गाउँपालिका–१ बाउनडाँडामा ट्रक अनियन्त्रित भई दुर्घटना हुँदा चालक ५३ वर्षीय गणेश खड्कासहित चार जनाको मृत्यु भएको छ। दुई जनाको घटनास्थलमै ज्यान गएको थियो भने अन्य दुई जनाको पाटन अस्पतालमा उपचारका क्रममा मृत्यु भएको प्रहरीको भनाइ छ।

प्रहरीले सबै दुर्घटनाका सम्बन्धमा थप अनुसन्धान गरिरहेको जनाएको छ।