पूर्वआईजीपी चन्द्रकुबेर खापुङलाई पनि फौजदारी मुद्दा चलाउन सिफारिस

काठमाडौँ। गत भदौ २३ र २४ मा भएको जेनजी प्रदर्शन र त्यसक्रममा भएको हिंसात्मक घटनाको छानबिन गर्न बनेको गौरीबहादुर कार्की नेतृत्वको आयोगले तत्कालीन प्रहरी महानिरीक्षक (पूर्वआईजीपी) चन्द्रकुबेर खापुङविरुद्ध पनि फौजदारी मुद्दा चलाउन सिफारिस गरेको छ।

आयोगले आइतबार सरकारलाई बुझाएको प्रतिवेदनमा घटनामा अत्यधिक बल प्रयोग भएको ठहर गर्दै अनुसन्धान र अभियोजन गर्नुपर्ने राय दिएको हो।

प्रतिवेदनअनुसार नयाँ बानेश्वर क्षेत्रमा प्रदर्शनकारी संसद् भवनतर्फ केन्द्रित भएपछि प्रहरीले गोली चलाएको थियो। फिल्डमा खटिएका केही अधिकृतहरूको भनाइलाई आधार मान्दै आयोगले त्यतिबेला आईजीपी रहेका खापुङले सञ्चार सेटमार्फत गोली चलाउन आदेश दिएको उल्लेख गरेको छ।

आयोगले तत्कालीन प्रधानमन्त्री केपी शर्मा ओली, गृहमन्त्री रमेश लेखक र काठमाडौँका तत्कालीन प्रमुख जिल्ला अधिकारी छविलाल रिजालविरुद्ध पनि फौजदारी कानुनअनुसार कारबाही प्रक्रिया अघि बढाउन सिफारिस गरेको जनाएको छ।

गृह मन्त्रालयको तथ्यांकअनुसार ती दुई दिनमा गोली लागेर ३९ जना प्रदर्शनकारीको मृत्यु भएको थियो भने प्रदर्शनसँग सम्बन्धित घटनामा कुल ७६ जनाले ज्यान गुमाएका थिए। आयोगले काठमाडौँ जिल्ला सुरक्षा समितिका पदाधिकारीहरूमाथि समेत विभागीय कारबाही गर्न सिफारिस गरेको छ।