नेपालगञ्जबाट सिमेन्ट लिएर जाँदै गरेको ट्रक दुर्घटना, चालकसहित चार जना घाइते

काठमाडौं । नेपालगञ्जबाट सिमेन्ट लिएर बझाङतर्फ गइरहेको ट्रक दुर्घटना हुँदा ४ जना घाइते भएका छन् ।

सिमेन्ट बोकेको सुपप्र ०१००१ ख २८०९ नम्बरको ट्रक आज बिहान २ बजेतिर  जयपृथ्वी राजमार्गस्थित  बैतडीको पाटन नगरपालिका–८ झ्याउलेक मोडमा दुर्घटना हुँदा  चालकसहित चार जना घाइते भएको प्रहरीले जानकारी दिएको छ।

प्रहरीका अनुसार दुर्घटनामा परेका मध्ये ३६ वर्षीय चालक कृष्ण विष्ट रहेका छन्। साथै, सोही स्थानकी २५ वर्षीया निर्मला विष्ट र उनका दुई साना छोरा—७ वर्षीय अभिषेक र ४ वर्षीय प्रयान्स—समेत घाइते भएका छन्। 

घाइते चारै जनालाई उपचारका लागि डडेल्धुरा अस्पताल पठाइएको प्रहरीले जनाएको छ। दुर्घटनापछि ट्रक सडकबाट करिब २५ मिटर तल खसेको बताइएको छ।

हालसम्म दुर्घटनाको ठोस कारण खुलेको छैन भने घटनाबारे थप अनुसन्धान भइरहेको जिल्ला प्रहरी कार्यालय बैतडीले जानकारी दिएको छ।