चोरीको मोटरसाइकलसहित २७ वर्षीय युवक ट्राफिक प्रहरीको नियन्त्रणमा

काठमाडौँ । ट्राफिक प्रहरीले चोरी भएको मोटरसाइकलसहित एक जनालाई पक्राउ गरेको छ।

काठमाडौँको कागेश्वरी मनोहरा नगरपालिका–१, सुन्दरीजल क्षेत्रबाट ट्राफिक प्रहरीले चोरी भएको मोटरसाइकलसहित एक युवकलाई नियन्त्रणमा लिएको जनाएको छ। पक्राउ पर्नेमा सर्लाहीको चक्रघट्टा गाउँपालिका–५ घर भएका तथा हाल सुन्दरीजल बस्दै आएका २७ वर्षीय सुजित कुमार सहनी रहेको काठमाडौं उपत्यका ट्राफिक  प्रहरी कार्यालयले जानकारी दिएको छ।

ट्राफिक प्रहरीका अनुसार सहनीले बागमती प्रदेश ०२–०२२ प २५६७ नम्बरको मोटरसाइकल नम्बर प्लेट बिना चलाइरहेका बेला सुन्दरीजल सडकखण्डमा फेला परेका थिए। सोही क्रममा चेकजाँच गर्दा मोटरसाइकल चोरीको रहेको पुष्टि भएपछि उनलाई नियन्त्रणमा लिइएको हो।

उक्त मोटरसाइकल काठमाडौँको जोरपाटीबाट हराएको भन्दै काठमाडौँ महानगरपालिका–६ निवासी राजु लामाले काठमाडौँ उपत्यका ट्राफिक प्रहरी कार्यालयमा खोजतलासका लागि निवेदन दिएका थिए।

पक्राउ परेका सहनीलाई आवश्यक अनुसन्धानका लागि प्रहरी वृत्त बौद्ध पठाइएको काठमाडौँ उपत्यका ट्राफिक प्रहरी कार्यालयका प्रवक्ता प्रहरी उपरीक्षक नरेश राज सुवेदीले जानकारी दिएका छन्।

ट्राफिक प्रहरीले सवारी साधन चोरी हुन नदिन सुरक्षित स्थानमा पार्किङ गर्ने, विभिन्न प्रकारका लक (ह्विल, चेन, ह्यान्डिल, डिस्क) प्रयोग गर्ने तथा एकान्त स्थानमा पार्किङ नगर्न सर्वसाधारणलाई अनुरोध गरेको छ।