युरोप पठाउने भन्दै ६५ लाख ठगी: ४ जना अपराध अनुसन्धान कार्यालयको नियन्त्रणमा

काठमाडौं । वैदेशिक रोजगारीमा आकर्षक तलबको प्रलोभन देखाएर युरोपका विभिन्न देश पठाइदिने भन्दै रकम ठगी गरेको अभियोगमा ४ जनालाई प्रहरीले पक्राउ गरेको जनाएको छ ।

पक्राउ पर्नेहरूमा रूपन्देही बुटवल उपमहानगरपालिका–२ बस्ने, सल्यान कालीमाटी गाउँपालिका–७ घर भएका ५२ वर्षीय कर्ण बहादुर राउत, काठमाडौं नागार्जुन नगरपालिका–९ बस्ने, तनहुँ भानु नगरपालिका–१२ घर भएका ४२ वर्षीय आनन्द थापा, नवलपरासी पूर्व कावासोती नगरपालिका–३ घर भएकी ३९ वर्षीया राधिका पाठक पौडेल र काठमाडौं महानगरपालिका–३१ बस्ने, मोरङ सुन्दरहरैँचा नगरपालिका–३ घर भएका ४७ वर्षीय तिलक परियार रहेका छन्।

प्रहरीका अनुसार कर्ण बहादुरले फिनल्याण्ड पठाइदिन्छु भन्दै ११ जना पीडितबाट ५७ लाख रुपैयाँ, आनन्दले माल्टा पठाइदिन्छु भन्दै १ जनाबाट ४ लाख ५० हजार रुपैयाँ, राधिकाले फिनल्याण्ड पठाइदिन्छु भन्दै २ जनाबाट ४ लाख २० हजार रुपैयाँ र तिलकले सर्बिया पठाइदिन्छु भन्दै २ जनाबाट ८ लाख रुपैयाँ लिई सम्पर्कविहीन भएको उजुरी परेको थियो ।

उक्त उजुरीका आधारमा काठमाडौं उपत्यका अपराध अनुसन्धान कार्यालय टेकुबाट खटिएको प्रहरीले कर्ण बहादुरलाई काठमाडौं महानगरपालिका–११, आनन्दलाई काठमाडौं महानगरपालिका–२६, राधिकालाई काठमाडौं महानगरपालिका–१२ र तिलकलाई काठमाडौं महानगरपालिका–२९ बाट पक्राउ गरेको जनाएको छ ।

प्रहरीका अनुसार उनीहरूलाई थप अनुसन्धान तथा कारबाहीका लागि वैदेशिक रोजगार विभाग ताहाचल काठमाडौं पठाइएको छ ।