गुण्डा नाइके सानुभाइ पक्राउ

काठमाडौं । 'सानुभाइ’ भनेर चिनिने गुण्डा नाइके युवराज गुरुङ पुनः प्रहरी नियन्त्रणमा परेका छन्। सामाखुसी क्षेत्रबाट गएराति उनलाई पक्राउ गरिएको काठमाडौं प्रहरी प्रमुख एसएसपी रमेश थापाले बताएका छन्।

गुरुङ यसअघि पनि पटक–पटक पक्राउ पर्ने र छुट्ने क्रममा देखिँदै आएका व्यक्ति हुन्। २०८० साल असारमा ठमेलस्थित क्लब ओम्नियाका सञ्चालकमाथि कुटपिट गरेको आरोपमा पक्राउ परेका उनलाई प्रहरीले हत्कडीसहित सार्वजनिक रूपमा बजार क्षेत्रमा घुमाएको घटना चर्चामा आएको थियो। त्यतिबेला प्रहरीले गुण्डागर्दीमा संलग्न व्यक्तिलाई चेतावनी दिन यस्तो कदम चालेको बताएको थियो।

उक्त घटनापछि जिल्ला प्रशासन कार्यालय काठमाडौंले अभद्र व्यवहार मुद्दामा गुरुङलाई १० हजार रुपैयाँ धरौटीमा रिहा गरेको थियो।