सशस्त्र प्रहरी प्रमुख अर्यालद्वारा उत्कृष्ट निर्वाचन प्रहरी र विपद् स्वयंसेवक सम्मानित

कैलाली । सशस्त्र प्रहरी प्रमुख आईजीपी राजु अर्यालले उत्कृष्ट कार्य गर्ने निर्वाचन प्रहरी, समुदाय स्तरका विपद् स्वयंसेवक तथा विपद् सूचकहरुलाई सम्मान गरेका छन् ।

कैलालीस्थित सशस्त्र प्रहरी बल नेपाल नं. ७ बैद्यनाथ बाहिनी मुख्यालयको २५औँ वार्षिकोत्सवको अवसरमा आईजीपी अर्यालद्वारा गत फागुन २१ गते सम्पन्न प्रतिनिधि सभा सदस्य निर्वाचन सफलतापूर्वक सम्पन्न गराउन योगदान पुर्‍याउने सुरक्षाकर्मी तथा विपद् व्यवस्थापनमा सक्रिय व्यक्तिहरूलाई सम्मान गरिएको हो।

सम्मानित हुने निर्वाचन प्रहरीहरुले बैतडी जिल्लाको दशरथचन्द्र नगरपालिका–४ स्थित वीरेन्द्र माध्यमिक विद्यालय साईलेक मतदान केन्द्रमा खटिई अपांग तथा ज्येष्ठ नागरिकलाई मतदान केन्द्रसम्म ल्याउने–लैजाने जस्ता मानवीय सेवामूलक कार्य गरेको सशस्त्र प्रहरी प्रधान कार्यालयले जनाएको छ।

त्यस्तै, समुदाय विपद् स्वयंसेवकहरूले बाढी तथा डुवानजस्ता विपद्का समयमा ज्यानको जोखिम मोलेर प्रभावित नागरिकलाई सुरक्षित स्थानमा पुर्‍याउन महत्वपूर्ण भूमिका निर्वाह गरेका थिए। विपद् सूचकहरूले भने घटनाको समयमै सूचना उपलब्ध गराई तथा स्वयं सक्रिय भई उद्धार कार्यमा सहयोग गरेका थिए।

सशस्त्र प्रहरी बल नेपालले समुदाय स्तरमै विपद् व्यवस्थापनलाई प्रभावकारी बनाउन देशभर १ हजार १ सय १४ जनालाई विपद् स्वयंसेवक तालिम प्रदान गरिसकेको छ। साथै, प्रत्येक वडामा २५ जनाको दरले विपद् सूचक समूह गठन गरिएको छ। यस अनुसार देशभरका ६ हजार ७ सय ४५ वडामा कुल १ लाख ६८ हजार ५ सय ७५ जना विपद् सूचक तयार भएका छन्।