ड्युटी सकेर फर्किदै गरेका इन्स्पेक्टरलाई ट्रकले ठक्कर दियो, इन्स्पेक्टर अभय गम्भीर घाइते

काठमाडौं । काठमाडौंमा ट्राफिक प्रहरी इन्सपेक्टर सवार मोटरसाइकललाई ट्रकले ठक्कर दिँदा गम्भीर घाइते भएका छन्। ड्युटी सकेर घर फर्किँदै गरेका ३२ वर्षीय इन्सपेक्टर अभय लामा दुर्घटनामा परेका हुन्।

राति करिब सवा ११ बजेको समयमा तारकेश्वर नगरपालिका–८ डाँडागाउँस्थित सडकमा उक्त घटना भएको हो। नेपालटारबाट फुटुङतर्फ जाँदै गरेका लामाको मोटरसाइकललाई विपरीत दिशाबाट आइरहेको ट्रकले ठक्कर दिएको प्रहरीले जनाएको छ।

इन्स्पेक्टरले चलाएको बागमती प्रदेश–०२–०२९ प ९४१५ नम्बरको मोटरसाइकललाई ठक्कर दिनेबागमती प्रदेश–०३–००१ ख १७१५ नम्बरको ट्रक र  मकवानपुरको मनहरी-५ का ३८ वर्षीय  चालक राम मोक्तानलाई नियन्त्रणमा लिएर प्रहरीले अनुसन्धान थालेको छ ।

घाइते लामालाई तत्काल उद्धार गरी उपचारका लागि त्रिवि शिक्षण अस्पताल लगिएको थियो। त्यहाँ प्राथमिक उपचारपछि उनलाई थप उपचारका लागि बीएण्डबी अस्पताल रिफर गरिएको छ।

काठमाडौं उपत्यका ट्राफिक प्रहरी कार्यालयको मानव स्रोत व्यवस्थापन शाखामा कार्यरत लामा रामेछापका स्थायी बासिन्दा हुन्। हाल उनी तारकेश्वर–७, फुटुङमा बसोबास गर्दै आएका छन्।