ट्याक्टरको ठक्करबाट बालिकाको मृत्यु

कैलाली । कैलालीमा ट्याक्टरको ठक्करबाट एक बालिकाको ज्यान गएको छ। बुधबार राति लम्कीचुहा नगरपालिका–५ स्थित चौरी क्षेत्रमा भित्री सडकमा भएको दुर्घटनामा ६ वर्षीया डिनल चौधरीको मृत्यु भएको हो।

प्रहरीका अनुसार राति करिब पौने ९ बजे घर नजिकै सडकमा खेलिरहेको अवस्थामा उनलाई से १ त ८७५८ नम्बरको ट्याक्टरले ठक्कर दिएको थियो। गम्भीर घाइते भएकी बालिकालाई तत्काल उपचारका लागि बर्दगोरिया अस्पताल पुर्‍याइए पनि उपचारकै क्रममा उनको निधन भएको जनाइएको छ।

दुर्घटनापछि ट्याक्टरसहित चालक, सोही स्थानका ३७ वर्षीय रामबहादुर चौधरीलाई प्रहरीले नियन्त्रणमा लिएको छ। घटनाबारे थप अनुसन्धान भइरहेको जिल्ला प्रहरी कार्यालय कैलालीले जानकारी दिएको छ।