बैंकिङ मुद्दा मिलाइदिने बहानामा लाखौं ठगी गरेर फरार भएका विश्वराम पक्राउ

काठमाडौं । बैंकिङ कसुर मुद्दा मिलाइदिने बहानामा ठगी गर्ने एक व्यक्ति पक्राउ परेका छन्। जिल्ला प्रहरी परिसर काठमाडौँले ५२ वर्षीय विश्वराम अधिकारी (दीपक नामले चिनिने) लाई नियन्त्रणमा लिएको हो। उनी काठमाडौँ महानगरपालिका–१६, वनस्थलीका बासिन्दा हुन्।

प्रहरीका अनुसार अधिकारीले नेपाल सरकार वादी र ध्रुव विक्रम मल्ल प्रतिवादी रहेको बैंकिङ कसुरसम्बन्धी मुद्दा मिलाइदिने आश्वासन दिएका थिए। सोही बहानामा उनले पीडितलाई झुक्याउँदै नगद र मोबाइल बैंकिङमार्फत पटक–पटक गरी कुल १ लाख ३० हजार रुपैयाँ असुलेका थिए। रकम लिएपछि उनी सम्पर्कविहीन बनेका थिए।

पीडितको उजुरीपछि प्रहरीले खोजी तीव्र बनाएको थियो। खोजीका क्रममा उनलाई वैशाख २ गते दिउँसो करिब ४ बजे काठमाडौँको बालाजु क्षेत्रबाट पक्राउ गरिएको हो।

हाल अधिकारीमाथि ठगीसम्बन्धी मुद्दामा अनुसन्धान अघि बढाइएको छ। जिल्ला अदालत काठमाडौँबाट सात दिनको म्याद थप गरेर थप अनुसन्धान भइरहेको जिल्ला प्रहरी परिसर काठमाडौँका प्रवक्ता प्रहरी उपरीक्षक पवन कुमार भट्टराईले जानकारी दिएका छन्।