बर्दियामा एम्बुलेन्सको ठक्करबाट बाजे र ७ वर्षीय नातिको मृत्यु

बर्दिया । बर्दियामा आज बिहान भएको सडक दुर्घटनामा एउटै परिवारका दुई जनाको मृत्यु भएको छ भने अन्य दुई जना घाइते भएका छन्।

बाँकेको कोहलपुरबाट राजापुरतर्फ गइरहेको लुम्बिनी प्रदेशको बी एए ०३०५ नम्बरको एम्बुलेन्सले बिहान करिब ५स:५ बजेतिर गुलरिया नगरपालिका–७ स्थित वन डिभिजन कार्यालय नजिक चार जना पैदलयात्रीलाई ठक्कर दिएको प्रहरीले जनाएको छ।

दुर्घटनामा गुलरिया नगरपालिका–५ निवासी ५५ वर्षीय भूमि लामिछाने र उनका करिब ७ वर्षीय नाति रिहान्सको घटनास्थलमै मृत्यु भएको जिल्ला प्रहरी कार्यालय बर्दियाले जानकारी दिएको छ। स्थानीयका अनुसार लामिछाने योग प्रशिक्षणमा संलग्न व्यक्ति थिए।

उक्त दुर्घटनामा लामिछानेकी ५० वर्षीया पत्नी सीता र ६५ वर्षीय स्थानीय सूर्य उपाध्याय घाइते भएका छन्। घाइते दुवैलाई थप उपचारका लागि नेपालगञ्जस्थित नर्सिङहोममा पठाइएको प्रहरीले जनाएको छ।

प्रहरीका अनुसार बिहान व्यायामका लागि निस्किएका उनीहरूलाई तीव्र गतिमा रहेको एम्बुलेन्सले ठक्कर दिएको प्रारम्भिक अनुसन्धानबाट खुलेको छ।