प्रहरीको विशेष 'स्वीप अपरेसन':एकैरातमा १२२ जना पक्राउ,सबैभन्दा बढी लागुऔषध सेवनकर्ता

काठमाडौं ।शान्ति सुरक्षा मजबुत बनाउने उद्देश्यले प्रहरीले गरेको विशेष “स्वीप अपरेसन” मा एकै रातमा १ सय २२ जनालाई पक्राउ  गरेको छ। उक्त अभियानमा एकै रात १२२ भन्दा बढी व्यक्तिलाई नियन्त्रणमा लिइएको प्रहरीले जनाएको छ।

जिल्ला प्रहरी कार्यालय कास्की तथा मातहतका युनिटले गरेको स्वीप अपरेसनमा पोखराका अलग–अलग स्थानबाट १२२ जना व्यक्तिहरूलाई नियन्त्रणमा लिइएको प्रहरीले जनाएको छ। पक्राउ पर्नेहरूमा बैदाम क्षेत्रबाट सबैभन्दा बढी ३९ जना रहेका छन्। त्यसैगरी रामबजारबाट २२, बगरबाट १२, सिसुवा क्षेत्रबाट ३८ र पृथ्वीचोक आसपासबाट ११ जनालाई नियन्त्रणमा लिइएको छ।

कास्की प्रहरीका अनुसार नियन्त्रणमा परेकामध्ये धेरैजसो व्यक्ति लागुऔषध, विशेषगरी गाँजा सेवनमा संलग्न भेटिएका छन्। कुल ८२ जना गाँजा सेवन गरिरहेको अवस्थामा पक्राउ परेका थिए। यस्तै सार्वजनिक स्थलमा होहल्ला गर्ने, सर्वसाधारणलाई असहज बनाउने, शान्ति भंग गर्ने तथा जथाभावी मोटरसाइकल चलाएर ध्वनि प्रदूषण गर्ने व्यक्तिहरू पनि कारबाहीको दायरामा परेका छन्।

पक्राउ परेकाहरूलाई भने हाल कडा कारबाही नगरी चेतावनीसहित अभिभावकको जिम्मा लगाइने तयारी गरिएको प्रहरीले जनाएको छ। उनीहरूको गतिविधि र अवस्थाको मूल्याङ्कन गर्दै पहिलो पटकका लागि सम्झाइबुझाइ गर्ने र भविष्यमा यस्ता कार्य नगर्ने प्रतिबद्धतासहित उनीहरुलाई अभिभावकको जिम्मा लगाइने प्रहरीले जनाएको छ।