सुकुम्बासीका नाममा हुने ठगी रोक्न नागरिक सूचना दिन प्रहरीको आग्रह

काठमाडौँ । नेपाल प्रहरीले  सुकुम्बासी तथा भूमिहीन नागरिकको पहिचान गरी न्यायोचित आवास, सुरक्षित बसोबास र सम्मानजनक जीवन सुनिश्चित गर्ने उद्देश्यले सञ्चालन गरेको व्यवस्थापन प्रक्रियामा सहयोग गर्न सर्वसाधारणलाई आग्रह गरेको छ।

नेपाल प्रहरीले आज  जारी गरेको एक सार्वजनिक सन्देशमा वास्तविक सुकुम्बासी तथा भूमिहीनको पहिचान गरी उनीहरूलाई अधिकार प्रदान गर्ने कार्य प्राथमिकतामा रहेको जनाएको छ। तर केही स्वार्थी तथा टाठाबाठा  प्रवृत्तिका व्यक्तिहरूले नागरिकको नाम र अधिकारको दुरुपयोग गर्दै अनुचित लाभ लिन खोजेकोप्रति  गम्भीर ध्यानाकर्षण भएको उल्लेख गरिएको छ।

यस्ता गलत गतिविधिका कारण वास्तविक सुकुम्बासी तथा भूमिहीन नागरिकहरू राज्यबाट प्राप्त हुने सेवा–सुविधाबाट वञ्चित हुने अवस्था सिर्जना भइरहेको भन्दै प्रहरीले  सचेत रहन सबैलाई अनुरोध गरेको छ। साथै, नक्कली दाबी गर्ने व्यक्तिहरूको पहिचान गरी उनीहरूबाट जोगिन र आवश्यक परेमा सम्बन्धित निकायलाई सूचना दिन आग्रह गरिएको छ।

प्रहरीले  वास्तविक लाभग्राहीहरूलाई एकजुट भई राज्यको व्यवस्थापन कार्यमा सहयोग गर्न, तथा सुरक्षा निकायलाई समयमै सही सूचना उपलब्ध गराउन पनि आह्वान गरेको छ। नागरिकको सानो सहयोगले मात्रै पीडित वर्गको न्याय, अधिकार र सुरक्षित आवास सुनिश्चित गर्न महत्वपूर्ण योगदान पुग्ने प्रहरीले जनाएको छ।