नरैनापुरमा भीषण आगलागी: १५ घर र गोठ जले,, ५ घण्टापछि नियन्त्रण

नरैनापुर (बाँके)। बाँकेको नरैनापुर गाउँपालिका वडा नं.३ स्थित गेग्ली गाउँमा आज बिहान भीषण आगलागी हुँदा १५ वटा फुसको छानो भएका कच्ची घर तथा गोठ जलेका छन् । 

आज बिहान ४ :५० बजेतिर आगलागी भएको सूचना प्राप्त हुनासाथ सशस्त्र प्रहरीको नरैनापुरस्थित सीमा सुरक्षा गुल्मका डीएसपी लालसिंह बिष्टको नेतृत्वमा खटिएको गुल्म लगायत  बिओपी कटकुइँया र इलाका प्रहरी कार्यालय भगवानपुरका इन्स्पेक्टर गणेश राज उप्रेतीको नेतृत्वमा नेपाल प्रहरीको टोली तत्कालै घटनास्थलमा पुगेको थियो।

नेपाल प्रहरी, सशस्त्र प्रहरी, स्थानीय बासिन्दा तथा दमकलको संयुक्त प्रयासमा करिब ५ घण्टापछि बिहान साढे ९ बजे आगो पूर्ण रूपमा नियन्त्रणमा ल्याइएको सशस्त्र प्रहरीले जानकारी दिएको छ।

आगलागीबाट भएको क्षतिको विस्तृत विवरण संकलन भइरहेको र घटनाको कारणबारे अनुसन्धान भगवानपुर  प्रहरीले सुरु गरेको सशस्त्र प्रहरीले जनाएको छ।

तस्बिरहरु-