वैदेशिक रोजगारीका नाममा लाखौं ठगी: ७ जना प्रहरीको नियन्त्रणमा

काठमाडौं। वैदेशिक रोजगारीमा आकर्षक तलबको प्रलोभन देखाई विभिन्न देश पठाइदिने भन्दै ठगी गरेको आरोपमा सात जना पक्राउ परेका छन्।

पक्राउ पर्नेहरूमा गोकर्णेश्वर नगरपालिका–५ बस्ने तेह्रथुम घर भएका ४० वर्षीय सुरज पंधाक लिम्बु, सोलुखुम्बु घर भएका ४६ वर्षीय कमल बहादुर पुलामी मगर, काठमाडौं महानगरपालिका–१२ बस्ने काभ्रे घर भएका ३९ वर्षीय बिनोद थापा, कागेश्वरी मनोहरा नगरपालिका बस्ने सोलुखुम्बु घर भएका २९ वर्षीय सागर शेर्पा, गोकर्णेश्वर नगरपालिका–६ बस्ने सिन्धुपाल्चोक घर भएका ५६ वर्षीय सूर्य प्रसाद कोइराला, काठमाडौं महानगरपालिका–३२ बस्ने काभ्रे घर भएका २६ वर्षीय प्रल्हाद खत्री र ३३ वर्षीय सरोज गौतम रहेका छन्।

प्रहरीका अनुसार सुरज र कमल बहादुरले जापान पठाइदिने भन्दै ११ जना पीडितबाट १ करोड २ लाख रुपैयाँ ठगी गरेका छन्। त्यस्तै, बिनोदले कोरिया पठाइदिने भन्दै २६ जनाबाट १ करोड ५० लाख रुपैयाँ असुलेका छन् भने सागरले फ्रान्स पठाइदिने भन्दै ५ जनाबाट २८ लाख रुपैयाँ लिएका छन्।

यसैगरी, सूर्य प्रसादले अमेरिका पठाइदिने भन्दै १ जना पीडितबाट २ लाख रुपैयाँ, प्रल्हाद र सरोजले ग्रीस पठाइदिने भन्दै एकरएक जनाबाट १७र१७ लाख रुपैयाँ ठगी गरी सम्पर्कविहीन भएको उजुरीका आधारमा उनीहरूलाई पक्राउ गरिएको हो।

काठमाडौं उपत्यका अपराध अनुसन्धान कार्यालय टेकुको टोलीले उनीहरूलाई विभिन्न स्थानबाट पक्राउ गरेको हो।

पक्राउ परेका सुरज र कमल बहादुरलाई थप अनुसन्धान तथा कारबाहीका लागि जिल्ला प्रहरी परिसर काठमाडौं पठाइएको छ भने अन्य पाँच जनालाई आवश्यक अनुसन्धानका लागि वैदेशिक रोजगार विभाग ताहाचल काठमाडौं पठाइएको प्रहरीले जनाएको छ।