पेस्तोल र लागुऔषधसहित ४ जना प्रहरीको नियन्त्रणमा

काठमाडौं । काठमाडौं उपत्यकाका विभिन्न स्थानबाट अवैध हातहतियार तथा नियन्त्रित लागुऔषधसहित चार जना पक्राउ परेका छन्।

बुढानिलकण्ठ नगरपालिका–५ लगायत क्षेत्रबाट प्रहरीले पेस्तोल एक थान, सोही पेस्तोलका तीन थान म्याग्जिन, चार राउण्ड गोली, एसएलआर हतियारका दुई राउण्ड गोली तथा ट्रामाडोल १६ हजार ७ सय ५० ट्याब्लेट बरामद गरेको छ।

पक्राउ पर्नेहरूमा बुढानिलकण्ठ नगरपालिका–५ बस्ने २३ वर्षीय कबिर देउला, ४२ वर्षीया सबिना पोडे, २६ वर्षीय सन्सार सिटौला तथा ललितपुरको गोदावरी नगरपालिका–११ बस्ने २६ वर्षीय सुबास साही रहेका छन्।

लागूऔषध नियन्त्रण ब्यूरो, कोटेश्वरबाट खटिएको प्रहरी टोलीले उनीहरूलाई उक्त हातहतियार र लागुऔषधसहित नियन्त्रणमा लिएको हो। घटनाबारे थप अनुसन्धान भइरहेको प्रहरीले जनाएको छ।