वैदेशिक रोजगारीको प्रलोभनमा ठगी गर्ने ४ जना पक्राउ, साढे ८१ लाख रुपैयाँ ठगी

काठमाडौं । वैदेशिक रोजगारीका लागि विभिन्न देश पठाइदिन्छु भन्दै सर्वसाधारणलाई ठगी गर्ने चार जनालाई प्रहरीले पक्राउ गरेको छ। 

आकर्षक तलबको प्रलोभन देखाउँदै कतार, इराक, अष्ट्रेलिया र क्रोएसिया पठाइदिन्छु भन्दै लाखौं रकम असुली गरेको आरोपमा काठमाडौं उपत्यका अपराध अनुसन्धान कार्यालय, टेकुबाट खटिएको टोलीले मोरङको कटहरी गाउँपालिका–६ घर भएका ३७ वर्षीय नारायण जोशीलाई पक्राउ गरेको छ। उनले कतार पठाइदिन्छु भन्दै ४८ लाख ५० हजार रुपैयाँ ठगी गरेको पाइएको छ। उनलाई धनुषाको जनकपुरधाम उपमहानगरपालिका–४ बाट पक्राउ गरिएको हो। यस घटनामा १४ जना पीडित रहेका छन् भने ७ वटा मुद्दा दर्ता भएको छ।

यस्तै, सुर्खेतको बराहताल गाउँपालिका–१ घर भएका २४ वर्षीय गोपाल विक्रम रानाले इराक पठाइदिन्छु भन्दै २० लाख रुपैयाँ ठगी गरेका थिए। उनलाई काठमाडौं महानगरपालिका–३२ बाट पक्राउ गरिएको हो। यस घटनामा ३ जना पीडित रहेका छन्।

भक्तपुरको मध्यपुर थिमी नगरपालिका–१ घर भएका ३२ वर्षीय नवराज पौडेलले अष्ट्रेलिया पठाइदिन्छु भन्दै ३ लाख रुपैयाँ ठगी गरेका थिए। उनलाई काठमाडौंको बुढानीलकण्ठ क्षेत्रबाट पक्राउ गरिएको अपराध अनुसन्धान कार्यालयले जनाएको छ। यसमा १ जना पीडित रहेका छन्।

त्यसैगरी, मकवानपुरको थाहा नगरपालिका–६ घर भएका ४५ वर्षीय डवाङ लामा क्रोएसिया पठाइदिन्छु भन्दै १० लाख रुपैयाँ ठगी गरेको आरोपमा पक्राउ परेका छन्। उनलाई काठमाडौं महानगरपालिका–६ नागार्जुन क्षेत्रबाट पक्राउ गरिएको हो। यस घटनामा २ जना पीडित रहेका छन्।

काठमाडौं उपत्यका अपराध अनुसन्धान कार्यालयका अनुसार पीडितहरूको उजुरीका आधारमा उनीहरूलाई विभिन्न स्थानबाट पक्राउ गरी थप अनुसन्धान तथा आवश्यक कारबाहीका लागि वैदेशिक रोजगार विभाग, ताहाचल पठाइएको छ।