डीआईजी अधिकारी र ट्राफिक प्रहरी प्रमुख पुरस्कृत

काठमाडौं । उत्कृष्ट कार्यसम्पादन गर्ने दुई वरिष्ठ प्रहरी अधिकृतलाई पुरस्कृत गरिएको छ। काठमाडौं उपत्यका प्रहरी कार्यालयका डीआईजी ओम अधिकारी र उपत्यका ट्राफिक प्रहरी कार्यालयका प्रमुख  एसएसपी नवराज अधिकारीलाई काठमाडौं उपत्यकाको शान्ति सुरक्षा, अपराध नियन्त्रण तथा ट्राफिक व्यवस्थापनमा उल्लेखनीय योगदान पुर्‍याएको भन्दै उपत्यका प्रहरी प्रमुख एआईजी ईश्वर कार्कीले पुरस्कृत गरेका हुन् ।

पछिल्लो समय काठमाडौं उपत्यकामा बढ्दो सुरक्षा चुनौतीका बीच प्रभावकारी सुरक्षा व्यवस्थापन, अपराध अनुसन्धान तथा ट्राफिक नियन्त्रणमा उल्लेखनीय भूमिका निर्वाह गरेपछि दुवै अधिकृतलाई पुरस्कार प्रदान गरिएको हो । प्रहरी संगठनले उत्कृष्ट कार्य गर्ने अधिकृतलाई प्रोत्साहन गर्दै संगठनभित्र जिम्मेवारी, सक्रियता र परिणाममुखी कार्यसंस्कृतिलाई थप मजबुत बनाउने उद्देश्यले यस्तो सम्मान गर्दै आएको जनाएको छ ।

डीआईजी  अधिकारीले उपत्यकाको सुरक्षा व्यवस्थापनलाई थप प्रभावकारी बनाउन नेतृत्वदायी भूमिका खेल्दै आएका छन् । चोरी, लुटपाट, लागूऔषध कारोबार, संगठित अपराध तथा अन्य आपराधिक गतिविधि नियन्त्रणका लागि उनले प्रभावकारी रणनीति अपनाएको प्रहरी अधिकारीहरू बताउँछन् । साथै समुदाय–प्रहरी साझेदारीलाई प्राथमिकतामा राख्दै नागरिकसँगको सम्बन्ध सुधार्न पनि उनले विशेष पहल गर्दै आएका छन्। प्रहरीका अनुसार यसले प्रहरीप्रति नागरिकको विश्वास बढाउन सहयोग पुगेको छ ।

त्यसैगरी एसएसपी अधिकारीको नेतृत्वपछि काठमाडौं उपत्यकाको ट्राफिक व्यवस्थापनमा उल्लेखनीय सुधार आएको चर्चा भइरहेको छ । ट्राफिक जाम व्यवस्थापन, सडक दुर्घटना न्यूनीकरण, ट्राफिक नियम उल्लंघन गर्ने सवारीमाथि कडाइ तथा जनचेतनामूलक अभियान सञ्चालनमा उनले सक्रिय भूमिका निर्वाह गरेका छन् ।

एसएसपी अधिकारी आफैं सडकमा खटिएर ट्राफिक प्रहरीको मनोबल उच्च बनाउने, सवारी चालक तथा यात्रुसँग प्रत्यक्ष संवाद गर्ने र व्यस्त सडक तथा चोकहरूको अवस्थाबारे स्थलगत अनुगमन गर्ने कार्यमा सक्रिय देखिने गरेका छन् । यसले ट्राफिक प्रहरीको कार्यशैली थप अनुशासित, जिम्मेवार र जनउत्तरदायी बन्न सहयोग पुगेको सर्वसाधारणको बुझाइ छ।

उनकै नेतृत्वमा ट्राफिक नियम उल्लंघन गर्ने सवारीमाथि नियमित चेकजाँच अभियान सञ्चालन हुनुका साथै दुर्घटना न्यूनीकरणका लागि विभिन्न सचेतनामूलक कार्यक्रमहरू प्रभावकारी रूपमा अघि बढाइएको बताइएको छ । उपत्यकाका मुख्य सडकहरूमा ट्राफिक व्यवस्थापनलाई व्यवस्थित बनाउन गरिएको सक्रियताले सर्वसाधारणबाट समेत सकारात्मक प्रतिक्रिया पाइरहेको छ ।

प्रहरी संगठनभित्र उत्कृष्ट कार्य गर्ने अधिकृतलाई प्रोत्साहन गर्ने उद्देश्यले प्रदान गरिएको यो पुरस्कारले अन्य प्रहरी कर्मचारीलाई समेत थप जिम्मेवार र प्रेरित बनाउने विश्वास गरिएको छ ।