लागूऔषध तस्करीको नयाँ तरिका: काँक्रोभित्र लुकाइएको सय ग्राम हेरोइन बरामद, प्रहरी नै चकित!

काठमाडौं ।  लागूऔषध ओसारपसारका लागि नयाँ तरिका प्रयोग गरिएको घटना सार्वजनिक भएको छ। प्रहरीले काँक्रोभित्र लुकाएर ल्याइएको ठुलो परिमाणमा खैरो हेरोइनसहित एक जनालाई पक्राउ गरेको छ। उक्त घटनामा प्रहरी नै चकित परेको हो।

विशेष सूचनाका आधारमा गरिएको सिन्धुलीमा सवारी जाँचका क्रममा काँक्रोमा प्वाल पारेर भित्र प्लास्टिकले बेरेर राखिएको अवस्थामा खैरो हेरोइन फेला परेको प्रहरीले जनाएको छ। उक्त पदार्थ प्रारम्भिक परीक्षणमा तौल गर्दा  १०० ग्राम ४२० मिलिग्राम रहेको प्रहरीले  जनाएको  छ।

प्रहरीका अनुसार पछिल्लो समय लागूऔषध तस्करहरूले दैनिक उपभोग्य वस्तु, विशेषगरी तरकारीजस्ता सामानभित्र लागूऔषध लुकाएर ओसारपसार गर्ने प्रवृत्ति बढ्दो छ। यस्तो शैलीले निगरानी र नियन्त्रण कार्यमा थप चुनौती सिर्जना गरेको प्रहरीको भनाइ छ।

घटनामा संलग्न श्रेष्ठलाई नियन्त्रणमा लिएर अनुसन्धान अघि बढाइएको छ। सिन्धुली जिल्ला अदालतबाट १० दिनको म्याद थप अनुमति लिएर विस्तृत अनुसन्धान भइरहेको जिल्ला प्रहरी कार्यालय सिन्धुलीले जनाएको छ।