आफूखुशी गैरहाजिर भएका ११ प्रहरीलाई ७ दिनभित्र हाजिर हुन निर्देशन

काठमाडौं ।  प्रहरी प्रधान कार्यालयले चैत महिनादेखि सम्पर्कविहीन रहेका ११ जना प्रहरी कर्मचारीलाई सात दिनभित्र कार्यालयमा उपस्थित हुन निर्देशन दिएको छ। प्रहरी प्रधान कार्यालयले आज एक सूचना जारी गर्दै लामो समयदेखि आफूखुशी गैरहाजिर रहेका कर्मचारीहरूलाई स्पष्टीकरणसहित हाजिर हुन निर्देशन दिएको  हो।

सूचनाअनुसार गैरहाजिर हुनेमा प्रहरी सहायक हवलदारहरू राम सकल रावत, ओमबहादुर चौधरी थारू र नरजंग वली रहेका छन्। यस्तै प्रहरी जवानहरू पुनम चन्द, हरी भुल, केशर कुँवर, सन्दीप कार्की, नवीन कोइराला, राहुलकुमार साह, राजकुमार गुरुङ तथा प्रहरी कार्यालय सहयोगी विशाल कुँवर पनि सम्पर्कविहीन रहेको जनाइएको छ।

प्रहरी प्रधान कार्यालयका अनुसार ती कर्मचारीहरू गत चैत महिनाका विभिन्न मितिदेखि बिना जानकारी अनुपस्थित छन्। खोजतलास तथा नियमअनुसार सूचना टाँस गर्ने प्रक्रिया पूरा हुँदासमेत उनीहरू सम्पर्कमा नआएको कार्यालयले उल्लेख गरेको छ।

प्रकाशित सूचनामा बाटोको म्यादबाहेक सात दिनभित्र उपस्थित भई आफ्नो स्पष्टीकरण पेश गर्न भनिएको छ। तोकिएको समयभित्र सम्पर्कमा नआए प्रहरी नियमावलीअनुसार सेवाबाट हटाउने प्रक्रिया अघि बढाइने चेतावनी पनि दिइएको छ।