बिरामी भेटेर घर फर्किने क्रममा रोल्पामा रुखले च्याप्दा सासू-बुहारीको मृत्यु

रोल्पा । रोल्पामा हावा हुरीले ढालेको रुखले लागेर दुई सासू- बुहारीको मृत्यु भएको छ ।  थवाङ गाउँपालिका – २ हेलोवाङकी ६० बर्षीया रुजु झाँर्की र सोही ठाउँकी ५० बर्षीया मनबुजी झाँर्कीको हावा हुरीले ढालेको रुखले लागेर मृत्यु भएको प्रहरीले जानकारी दिएको छ।

रुजुको घटनास्थलमै र गम्भीर घाइते अवस्थाकी मनबुजीको थवाङ आधारभूत अस्पतालको उपचारपछि थप उपचारका लागि कास्कीको पोखरातर्फ लाने क्रममा मंगलबार बिहान साढे २ बजेतिर बाटोमा मृत्यु भएको रोल्पा प्रहरीले जनाएको  छ ।

उनीहरु दुबै जनालाई थवाङ आधारभूत अस्पतालबाट बिरामी भेटेर घरतर्फ फर्किने क्रममा सोमबार बेलुकी पौने ८ बजेतिर हावाहुरीसहितको पानी पर्दा बाटोमाथिबाट उत्तिसको रुख ढलेर च्यापेको थियो ।

इलाका प्रहरी कार्यालय थवाङका प्रहरी प्रमुख प्रहरी निरीक्षक रामचन्द्र बगालेका अनुसार सूचना पाउना साथ बेलुकी सवा ८ बजेतिर प्रहरी पुगी उद्धार पछि अस्पताल पुर्‍याएको थियो ।