आकर्षक तलबको प्रलोभनमा वैदेशिक रोजगारी दिलाइदिने भन्दै ठगी गर्ने ६ जना पक्राउ

काठमाडौं । आकर्षक तलबको प्रलोभनमा पारी विभिन्न देश पठाइदिने भन्दै लाखौं रुपैयाँ ठगी गरेको अभियोगमा प्रहरीले ६ जनालाई पक्राउ गरेको छ ।

पक्राउ पर्नेहरूमा काठमाडौं तारकेश्वर नगरपालिका–७ बस्ने उदयपुर रौतामाई गाउँपालिका–४ घर भएका ४५ वर्षीय राम बहादुर आले मगर, काठमाडौं गोकर्णेश्वर नगरपालिका–६ बस्ने सिराहा लहान नगरपालिका–६ घर भएका ३२ वर्षीय आशिष कार्की, काठमाडौं टोखा नगरपालिका–४ बस्ने ७९ वर्षीय लोक बहादुर श्रेष्ठ, सोही नगरपालिका–३ बस्ने ४१ वर्षीया तुलसा पुन मगर, काठमाडौं महानगरपालिका–२९ बस्ने पाल्पा तानसेन नगरपालिका–७ घर भएका ४८ वर्षीय कृष्ण प्रसाद पोखरेल तथा काठमाडौं चन्द्रागिरी नगरपालिका–११ बस्ने २९ वर्षीय प्रबिन श्रेष्ठ रहेका छन् ।

प्रहरीका अनुसार राम बहादुरले क्यानडा पठाइदिने भन्दै ४ जना पीडितबाट ३९ लाख ५८ हजार रुपैयाँ, आशिषले न्यूजिल्याण्ड पठाइदिने भन्दै ३ जना पीडितबाट १३ लाख रुपैयाँ, लोक बहादुरले युके पठाइदिने भन्दै १ जना पीडितबाट १९ लाख रुपैयाँ, तुलसाले अमेरिका पठाइदिने भन्दै १ जना पीडितबाट १० लाख रुपैयाँ, कृष्ण प्रसादले यूएई पठाइदिने भन्दै १ जना पीडितबाट १० लाख रुपैयाँ तथा प्रबिनले सर्बिया पठाइदिने भन्दै १ जना पीडितबाट ६ लाख रुपैयाँ ठगी गरेको आरोप छ ।

उनीहरूले रकम लिएपछि सम्पर्कविहीन भएको भन्दै पीडितहरूले दिएको उजुरीका आधारमा काठमाडौं उपत्यका अपराध अनुसन्धान कार्यालय टेकुबाट खटिएको प्रहरीले उनीहरूलाई काठमाडौंका विभिन्न स्थानबाट पक्राउ गरेको जनाएको छ ।

पक्राउ परेका राम बहादुर र आशिषलाई आवश्यक अनुसन्धान तथा कारबाहीका लागि जिल्ला प्रहरी परिसर काठमाडौं पठाइएको छ भने लोक बहादुर, तुलसा, कृष्ण प्रसाद र प्रबिनलाई थप अनुसन्धान तथा कारबाहीका लागि वैदेशिक रोजगार विभाग ताहाचल पठाइएको प्रहरीले जनाएको छ ।