पूर्वप्रहरी गणेश कार्कीको अपराध श्रृंखला अन्त्य, जेलबाट भागेका प्रहरीको कारबाहीमा पक्राउ

काठमाडौं । विभिन्न आपराधिक घटनामा संलग्न रहेको आरोप लागेका पूर्व प्रहरी तथा फरार कैदी गणेश कार्कीलाई प्रहरीले काठमाडौंको जडीबुटी क्षेत्रबाट गोली हानेर नियन्त्रणमा लिएको छ। पक्राउ गर्ने क्रममा प्रहरीको गोली लागेर उनी घाइते भएका छन्।

काठमाडौं प्रहरी परिसरका अनुसार बूढानीलकण्ठ–३ चपली भद्रकालीका ४० वर्षीय कार्की विगतमा नेपाल प्रहरीमा कार्यरत थिए। उनले केही वर्ष सेवा गरेपछि जागिर छाडेका थिए। त्यसयता उनीमाथि अभद्र व्यवहार, हातहतियार तथा ज्यानसम्बन्धी गम्भीर अपराधका मुद्दा दर्ता भएका थिए।

कर्तव्य ज्यान मुद्दामा दोषी ठहर भएपछि उनले लामो समय कैद सजाय भोगेका थिए। जेलमुक्त भएपछि पनि चोरी तथा डाँकाचोरीका घटनामा पुनः संलग्न भएको आरोपमा पक्राउ परेका उनी डाँका चोरी मुद्दामा सजाय काट्दै गर्दा २०८२ साल भदौ २४ मा केन्द्रीय कारागारबाट फरार भएका थिए।

प्रहरीका अनुसार फरार जीवन बिताइरहेका कार्कीले आफूलाई प्रहरीको परिचय दिँदै काठमाडौं उपत्यकाका विभिन्न स्थानमा लुटपाट र चोरीका घटना सञ्चालन गर्दै आएका थिए। विदेश जाने यात्रु, लागुऔषध प्रयोगकर्ता तथा सर्वसाधारणलाई लक्ष्य बनाएर नगद, मोबाइल तथा अन्य सामान लुट्ने गरेको प्रारम्भिक अनुसन्धानले देखाएको छ।

उनले केही समयअघि पक्राउ गर्न पुगेका सादा पोशाकका प्रहरीमाथि आक्रमण गरी भाग्न सफल भएको घटनासमेत सार्वजनिक भएको छ। साथै गौशाला, पिङ्लास्थान, शान्तिनगर, तिलगंगा, पशुपति क्षेत्र, जोरपाटी र विमानस्थल आसपासका क्षेत्रमा भएका विभिन्न लुटपाट तथा चोरीका घटनामा उनको संलग्नता रहेको प्रहरीको दाबी छ।

विशेष सूचनाका आधारमा खोजी अभियान चलाइरहेको प्रहरीले  जडीबुटीस्थित रोयल पार्टी प्यालेस नजिक उनलाई नियन्त्रणमा लिने प्रयास गरेको थियो। सो क्रममा प्रहरीको गोली लागेर घाइते भएको बताइएको छ।

घाइते कार्कीलाई तत्काल उपचारका लागि काठमाडौंस्थित ट्रमा सेन्टर लगिएको प्रहरीले जनाएको छ। घटनाबारे थप अनुसन्धान भइरहेको छ।