चोरी भएका ५ वटा मोटरसाइकल र स्कुटरसहित ३ जना पक्राउ

काठमाडौँ । प्रहरीले चोरीका ५ वटा मोटरसाइकलसहित ३ जना चोरलाई पक्राउ गरेको छ। जिल्ला प्रहरी परिसर काठमाडौँले काठमाडौंको तारकेश्वर नगरपालिका–६ धर्मस्थलीबाट चोरीका ५ मोटरसाइकलसहित पक्राउ गरेको जानकारी दिएको छ।

चोरीका मोटरसाइकलसहित पक्राउ पर्नेमा रौतहटको राजदेवी नगरपालिका घर भेर हाल काठमाडौंको मैतीदेवी बस्ने २६ वर्षीय दिनेश कुसुहवा, मकवानपुरको बाग्मती गाउँपालिका–३ घर भएर हाल सिफल बस्ने २० वर्षीय नवराज माझी र गोरखाको गण्डकी गाउँपालिका–५ घर भएर हाल तारकेश्वर नगरपालिका–५ लोलाङ बस्ने २२ वर्षीय अमृत पुर्जा रहेको काठमाडौं प्रहरीले जनाएको छ।

जिल्ला प्रहरी परिसर काठमाडौंका प्रवक्ता प्रहरी उपरीक्षक पवन कुमार भट्टराईले उनीहरूलाई सोमबार राति करिब साढे ९ बजे धर्मस्थली क्षेत्रबाट नियन्त्रणमा लिइएको  जानकारी दिएका छन।

प्रहरीले पक्राउ परेकाहरूको साथबाट बा ७५ प ६८२४ नम्बरको २२० सीसीको पल्सर मोटरसाइकल, बा ७६ प १५०२ नम्बरको स्कुटर, बाग्मती प्रदेश ०२–०६३ प १६४१ नम्बरको २२० सीसीको पल्सर मोटरसाइकल, लु ४६ प ५०५२ नम्बरको २२० सीसीको पल्सर मोटरसाइकल तथा बाग्मती प्रदेश ०२–०६२ प ३३८४ नम्बरको १५० सीसीको पल्सर मोटरसाइकल बरामद गरेको जनाएको छ।

चोरीमा संलग्न रहेको आशंकामा पक्राउ परेका तीनै जनामाथि प्रहरी वृत्त बालाजुबाट थप अनुसन्धान भइरहेको काठमाडौं प्रहरीले जनाएको छ।