रोल्पामा बोलेरो जिप दुर्घटना: ३ जनाको मृत्यु

रोल्पा।  रोल्पामा जिप दुर्घटना हुँदा तीन जनाको मृत्यु भएको छ।  जिल्लाको माडी गाउँपालिका–२ घर्तिगाउँस्थित सहिद मार्गअन्तर्गत कालापहर क्षेत्रमा आज बिहान भएको जिप दुर्घटनामा  ३ जनाको मृत्यु भएको प्रहरीले जानकारी दिएको छ।

प्रहरीका अनुसार अस्थायी नम्बर प्लेट भएको बोलेरो जिप सडकबाट करिब  ६ सय मिटर तल खसेर हो। दुर्घटनास्थलमा हालसम्म नाम, थर र ठेगाना नखुलेका २ पुरुष र १ महिलाको शव फेला परेको छ।

जस्तापाता तथा प्लास्टिकका पाइप बोकेर गइरहेको उक्त जिप अनियन्त्रित भई दुर्घटनामा परेको प्रारम्भिक अनुमान गरिएको छ। दुर्घटनापछि प्रहरी टोली घटनास्थलमा पुगेर उद्धार, मुचुल्का तथा थप अनुसन्धानको काम गरिरहेको छ।

मृतकहरूको पहिचान खुल्न बाँकी रहेको प्रहरीले जनाएको छ। दुर्घटनाको कारणबारे थप विवरण आउन बाँकी छ।