विश्वकप लक्षित अनलाइन बेटिङको जोखिम बढ्न सक्ने भन्दै प्रहरीले दियो चेतावनी

काठमाडौँ । फिफा विश्वकप २०२६ सुरु हुन लागेसँगै अनलाइन बेटिङ र सट्टेबाजीका नाममा हुने ठगीप्रति नेपाल प्रहरीले सर्वसाधारणलाई सचेत रहन आग्रह गरेको छ।अमेरिका, मेक्सिको र क्यानडामा संयुक्त रूपमा आयोजना हुन लागेको विश्वकप फुटबलले विश्वभरका फुटबल समर्थकको ध्यान तानेको छ।

नेपालमा पनि प्रतियोगिताप्रति व्यापक उत्साह देखिँदै गर्दा सामाजिक सञ्जाल र विभिन्न डिजिटल माध्यममार्फत बेटिङ तथा सट्टेबाजीमा सहभागी गराउने प्रयास बढ्न सक्ने भन्दै प्रहरीले चेतावनी दिएको हो।

प्रहरीले सार्वजनिक गरेको भिडियो सन्देशमा ‘थोरै लगानीमा धेरै आम्दानी’, ‘घरमै बसेर सजिलै पैसा कमाउने अवसर’ जस्ता आकर्षक विज्ञापन र योजनाप्रति सचेत रहन आग्रह गरिएको छ। यस्ता प्रचारप्रसार प्रायः ठगी गर्ने समूहले प्रयोग गर्ने माध्यम भएको प्रहरीको भनाइ छ।

प्रहरीका अनुसार सुरुमा केही रकम जितेको अनुभूति गराएर विश्वास दिलाइन्छ, तर पछि थप रकम लगानी गर्न लगाएर आर्थिक ठगी गरिने सम्भावना उच्च हुन्छ। त्यसैले मोबाइल वा सामाजिक सञ्जालमा देखिने यस्ता विज्ञापनलाई आँखामुनि विश्वास नगर्न आग्रह गरिएको छ।

प्रहरीले अनलाइन बेटिङ तथा सट्टेबाजीमा संलग्न हुनु कानुनविपरीत कार्य भएको पनि स्मरण गराएको छ। मुलुकी अपराध संहिता, २०७४ अनुसार सट्टेबाजी सम्बन्धी गतिविधि दण्डनीय मानिन्छ।

साथै, आफ्नो समुदाय वा वरपर अनलाइन सट्टेबाजी सञ्चालन भएको जानकारी प्राप्त भएमा सम्बन्धित निकायलाई सूचना दिन समेत प्रहरीले अनुरोध गरेको छ।

विश्वकपको उत्साहलाई सुरक्षित र स्वस्थ तरिकाले मनाउन तथा गैरकानुनी गतिविधिबाट टाढा रहन प्रहरीले सबैलाई आग्रह गरेको छ।