दाङमा ब्राउन सुगरसहित एक पक्राउ, अवैध उत्खननमा संलग्न ९ सवारीसाधन नियन्त्रणमा

दाङ । दाङ प्रहरीले लागुऔषध नियन्त्रण र अवैध नदीजन्य पदार्थ उत्खननविरुद्ध सञ्चालन गरेको अभियानमा ब्राउन सुगरसहित एक जनालाई पक्राउ गर्नुका साथै अवैध उत्खननमा प्रयोग भएका ९ वटा सवारीसाधन नियन्त्रणमा लिएको छ।

विशेष सूचनाका आधारमा इलाका प्रहरी कार्यालय भालुबाङबाट खटिएको प्रहरी टोलीले राप्ती गाउँपालिका–१ भालुबाङबाट कपिलवस्तुको शिवराज नगरपालिका–५ पर्चियाका ४२ वर्षीय साकिर खानलाई पक्राउ गरेको हो। उनको साथबाट ६ ग्राम ७७० मिलिग्राम ब्राउन सुगर बरामद भएको दाङ प्रहरीले जनाएको छ। जेठ २२ गते पक्राउ परेका साकीरसँग भालुबाङ प्रहरीले पक्राउ परेका थप अनुसन्धान गरिरहेको प्रहरीले जानकारी दिएको छ।

त्यसैगरी, जेठ २१ गतेदेखि २५ गतेसम्म जिल्ला प्रहरी कार्यालय दाङ तथा मातहतका प्रहरी कार्यालयबाट खटिएको टोलीले जिल्लाका विभिन्न स्थानमा अवैध रूपमा ढुंगा, बालुवा र गिट्टी उत्खनन तथा ओसारपसारमा संलग्न ३ वटा स्काभेटर -जेसीबी, २ वटा टिपर र ४ वटा ट्याक्टर नियन्त्रणमा लिएको थियो।

नियन्त्रणमा लिइएका सवारीसाधनलाई आवश्यक कारबाहीका लागि सम्बन्धित निकायमा बुझाइएकोमा ५ लाख १५ हजार रुपैयाँ जरिवाना गरिएको जिल्ला  प्रहरी कार्यालय दाङले जनाएको छ। जरिवाना तिरेपछि सवारीसाधनहरू सम्बन्धित व्यक्तिको जिम्मा लगाइएको छ।