बाँकेबाट ब्राउन सुगरसहित युवती पक्राउ, १२ लाख बढीका अवैध सामान बरामद

बाँके । बाँकेमा लागूऔषध (ब्राउन सुगर) सहित एक युवतीलाई प्रहरीले पक्राउ गरेको छ।

जिल्ला प्रहरी कार्यालय बाँकेका अनुसार कोहलपुर नगरपालिका–९ पिपिरी क्षेत्रमा इलाका प्रहरी कार्यालय कोहलपुर र लागूऔषध नियन्त्रण ब्युरो शाखा कार्यालय नेपालगञ्जबाट खटिएको संयुक्त  टोलीले खजुरा गाउँपालिका–६ की २० वर्षीया अन्जली सुनारलाई ब्राउन सुगरसहित पक्राउ गरेको हो।

प्रहरीले उनको साथबाट  ३ ग्राम १४० मिलिग्राम ब्राउन सुगर बरामद गरेको जिल्ला प्रहरी कार्यालय बाँकेले जनाएको छ। पक्राउ परेकी सुनारविरुद्ध लागूऔषध सम्बन्धी कसुरमा बाँके जिल्ला अदालतबाट ८ दिनको म्याद थप अनुमति लिई थप अनुसन्धान भइरहेको प्रहरीले जनाएको छ।

यसैबीच, प्रहरीले बाँके जिल्लाका विभिन्न स्थानबाट भन्सार छली चोरी पैठारी गरी ल्याइएका विभिन्न सामान पनि बरामद गरेको छ। बरामद गरिएका सामानमा सुर्तीजन्य पदार्थ, फलफूल, खाद्यान्न, भाँडाकुँडा, माउन्टेन ड्यू पेय पदार्थ, औषधि, कस्मेटिक सामग्री तथा हार्डवेयरका सामान रहेका छन्।

बरामद सामानको अनुमानित मूल्य १२ लाख ५ हजार २६५ रुपैयाँ रहेको बाँके प्रहरीले जनाएको छ। उक्त सामानलाई आवश्यक कारबाहीका लागि भन्सार कार्यालय नेपालगञ्ज पठाइएको छ।

बाँकेमा प्रहरीले लागूऔषध नियन्त्रण तथा अवैध कारोबार रोकथामका लागि जिल्लाभर निगरानी र कारबाहीलाई निरन्तरता दिएको जनाएको छ।