भारतीय नागरिकलाई बनाइयो नेपाली, नागरिकता काण्डमा दाङका वडाध्यक्षसहित ४ पक्राउ

दाङ । भारतीय नागरिकलाई जालसाजी गरि नेपाली नागरिकता बनाउन सघाएको पाइएपछि दाङका एक जना वडाध्यक्षसहित चार जनालाई प्रहरीले पक्राउ गरेको छ ।

जिल्लाको राजपुर गाउँपालिका – ४ का वडाध्यक्ष रामेश्वर अहिर पक्राउ परेका हुन । उनले भारतीय नागरिक आलम जोल्हालाई नेपाली नागरिकता बनाउन मद्दत गरेको आरोप लागेको छ । वडाध्यक्ष अहिरले जोल्हा आफ्नो वडाको स्थानीय बासिन्दा भएको भन्दै नागरिकताका लागि सिफारिस गरि दिएका थिए ।

इलाका प्रहरी कार्यालय गढवाका प्रहरी प्रमुख प्रहरी निरीक्षक डबलबहादुर बमका अनुसार सोही प्रकरणमा वडा सचिव राजकुमार कहार, भारतीय नागरिक ४४ वर्षीय आलम जोल्हा, कार्यालय सहयोगी मिना चौधरी पनि पक्राउ परेकी छिन ।

पक्राउ परेका सबैलाई जिल्ला अदालत दाङबाट सोमबार म्यादथप भइ नागरिकता सम्बन्धी कसुरमा अनुसन्धान सुरु गरिएको प्रहरी निरीक्षक बमले बताए । झुटा बिवरण पेश गरि नागरिकता दिलाउन भूमिका खेलेको आरोपमा इलाका प्रशासन कार्यालय लमहीका तत्कालीन प्रमुख प्रेम खवासपनि मुछिएका छन्। नागरिकतामा उनकै हस्ताक्षर छ । प्रहरीले खवासलाई पनि पक्राउ गर्ने तयारी गरेको छ ।