कोहलपुरमा अफिमसहित पक्राउ परेका विशाल थापामगर सुन्धारा जेलबाट भागेका कैदी, सजाय थियो १० वर्ष

कोहलपुर । बाँकेको कोहलपुरबाट १ किलोबढी अफिमसहित पक्राउ परेका २९ वर्षीय विशाल थापामगर काठमाडौंस्थित केन्द्रीय कारागार सुन्धाराबाट फरार भएका कैदी रहेको खुलासा भएको छ।

प्रहरी हिरासतमा राखेर अनुसन्धान गर्ने क्रममा बैजनाथ गाउँपालिका-३ नौवस्ताका विशाल यसअघि लागूऔषध खैरो हेरोइन मुद्दामा दोषी ठहर भई १० वर्ष कैद सजाय भोगिरहेका कैदी रहेको खुलेको प्रहरीले जनाएको छ। उनीविरुद्ध २०८१ वैशाख २३ गते काठमाडौंमा लागूऔषध मुद्दा दर्ता भएको थियो। उक्त मुद्दामा दोषी ठहर भएका विशाललाई अदालतले १० वर्ष कैद फैसला गरेको थियो।

सुन्धारा कारागारमा सजाय भुक्तानका क्रममा उनी जेनजी आन्दोलनका बेला गत भदौ २४ गते कारागारबाट फरार भएका थिए।

प्रहरीका अनुसार पक्राउ परेका विशालको आपराधिक पृष्ठभूमि खुलेपछि उनी फरार कैदीसमेत रहेको पुष्टि भएको हो।  प्रहरीले विशालको सबै आपराधिक पृष्ठभुमिबारे थप अनुसन्धान अगाडि बढाएको जनाएको छ।

लागूऔषध नियन्त्रण ब्यूरो शाखा कार्यालय नेपालगन्ज र इलाका प्रहरी कार्यालय कोहलपुरको संयुक्त टोलीले मंगलबार राति करिब १० बजे कोहलपुर नगरपालिका–१ कौशिलानगरस्थित बरपिपल प्रतिक्षालय क्षेत्रबाट विशालसँगै कोहलपुर नगरपालिका–१ कौशिलानगरका ४८ वर्षीय गगन बहादुर परियारलाई  अफिमसहित प्रहरीले पक्राउ गरेको थियो।