सरकारी जग्गा खाली गराउन पुगेका प्रहरीमाथि दाउ प्रहार, महिला पक्राउ

बाँके । बाँकेको बैजनाथ गाउँपालिका–६ स्थित ईश्वरी माध्यमिक विद्यालयको सरकारी जग्गा अतिक्रमण हटाउने क्रममा प्रहरीमाथि धारिलो हतियार (दाउ) प्रहार भएको छ।

सरकारी जग्गामा घरटहरा निर्माण गरी बस्दै आएकी अन्दाजी ३६ वर्षीया शाबित्री कुमारी शाहीले प्रहरी चौकी सम्झनामा कार्यरत प्रहरी हवल्दार सुनिल कुमार चौधरीमाथि दाउ प्रहार गरेको प्रहरीले जनाएको छ।

गाउँपालिकाले पटक–पटक सूचना जारी गरी जग्गा खाली गर्न आग्रह गरे पनि अटेर गरेपछि जिल्ला प्रशासन कार्यालय बाँकेको जेठ २७ गतेको पत्रका आधारमा अतिक्रमित संरचना हटाउने कार्य अघि बढाइएको थियो। सोही क्रममा शाहीले प्रहरी हवल्दार चौधरीमाथि दाउ प्रहार गरेकी हुन् ।

दाउ प्रहारबाट प्रहरी हवल्दार चौधरीको दाहिने काँध पछाडिको भागमा चोट लागेको छ। उनको स्वास्थ्य अवस्था सामान्य रहेको प्रहरीले जनाएको छ।

घटनापछि शाहीलाई दाउसहित नियन्त्रणमा लिइएको छ। घटनाबारे थप अनुसन्धान भइरहेको प्रहरीले जनाएको छ। घटना बिहीबार दिउँसोको हो।