नक्कली सरकारी कार्यालय खोलेर ठगी, के भन्छ बर्दिया प्रहरी ?

बर्दिया । सरकारी कार्यालयकै नाम दुरुपयोग गर्दै नक्कली कार्यालय स्थापना गरेर सर्वसाधारणलाई ठगी गरेको आरोपमा बर्दियामा एक दम्पती पक्राउ घटनामा प्रहरीले अनुसन्धान अगाडि बढाएको छ।

बर्दिया प्रहरीका अनुसार ठाकुरबाबा नगरपालिका–३ बगनाह बजारमा घर भाडामा लिएर ‘प्रगन्ना तथा बड्कापथ सिँचाइ विभाग’को नाममा नक्कली कार्यालय सञ्चालन गरिएको थियो। उक्त कार्यालयको नाममा कर्मचारी भर्ना गर्ने, विभिन्न आश्वासन दिने तथा आर्थिक लाभ उठाउने कार्य भएको उजुरीपछि प्रहरीले अनुसन्धान अघि बढाएको हो।

दाङको लमहीस्थित वास्तविक ‘प्रगन्ना तथा बड्कापथ सिँचाइ विभाग’को नाम प्रयोग गरी नक्कली कार्यालय सञ्चालन गरेको आरोपमा ठाकुरबाबा नगरपालिका–३ निवासी २४ वर्षीय घनश्याम न्यौपाने र उनकी श्रीमती, दाङ लमही नगरपालिका–५ की २३ वर्षीया कृपा चौधरीलाई पक्राउ गरिएको बर्दिया प्रहरीले  जानकारी दिएको छ।

अनुसन्धानका क्रममा उक्त कार्यालय यसै वर्षको फागुनदेखि सञ्चालनमा रहेको खुल्न आएको प्रहरीले जनाएको छ। कार्यालयका लागि गार्ड, कार्यालय सहयोगी लगायत विभिन्न पदमा १३ जनासम्म नियुक्ति गरिएको भए पनि उनीहरूलाई तलब नदिइएको पाइएको छ।

प्रहरीका अनुसार न्यौपानेले आफूलाई चार्टर्ड एकाउन्टेन्ट (सीए) र चौधरीले सातौँ तहको अधिकृत भएको भन्दै सर्वसाधारणलाई विश्वास दिलाउने प्रयास गरेका थिए। उनीहरूले कर्मचारीलाई काममा लगाएर ज्याला नदिएको, घरधनीलाई भाडा नतिरेको तथा सरकारी छाप र कागजातसमेत नक्कली रूपमा प्रयोग गरेको प्रारम्भिक अनुसन्धानबाट खुलेको छ।

यसबाहेक केही व्यक्तिलाई कार्यालयको कामको बहानामा आफ्नै घर तथा निर्माण कार्यमा समेत लगाइएको तथ्य फेला परेको प्रहरीले जनाएको छ। घटनाको सुरुआत भने घरधनीको उजुरीबाट भएको थियो। न्यौपाने दम्पतीले घरको तला थप्ने भन्दै करिब चार लाख रुपैयाँ सापटी लिएको तर फिर्ता नगरेको र घरभाडासमेत नतिरेपछि घरधनीले प्रहरीमा उजुरी दिएका थिए।

पक्राउ परेका दम्पतीविरुद्ध जिल्ला अदालतबाट सात दिनको म्याद थप गरी ‘ठगी तथा लिखत सम्बन्धी कसूर’ अन्तर्गत थप अनुसन्धान भइरहेको बर्दिया  प्रहरीले जनाएको छ।