२ दिनमै कोहलपुर–बैजनाथ क्षेत्रबाट ठुलो परिमाणको लागूऔषधसहित ५ जना पक्राउ

बाँके। बाँकेको कोहलपुर र बैजनाथ क्षेत्रमा दुई दिनको अन्तरालमा ठुलो परिमाणको लागूऔषध ब्राउन सुगरसहित पाँच जना पक्राउ परेका छन्। इलाका प्रहरी कार्यालय कोहलपुर र लागूऔषध नियन्त्रण ब्युरो शाखा कार्यालय नेपालगञ्जको संयुक्त टोलीले विभिन्न स्थानमा चेकजाँचका क्रममा उनीहरूलाई नियन्त्रणमा लिएको हो।

जिल्ला प्रहरी कार्यालय बाँकेका अनुसार जेठ ३१ गते बैजनाथ गाउँपालिका–३ सुतैयामा चेकजाँचका क्रममा कञ्चनपुरको बेलौरी नगरपालिका–१ घर भई हाल बैजनाथ–२ बस्ने २६ वर्षीय समिर शाही र भारतको बहराइच जिल्ला रुपैडियाका ४३ वर्षीय गोपी निसारलाई पक्राउ गरिएको छ। उनीहरूको साथबाट शुद्ध तौल २८ ग्राम २० मिलिग्राम ब्राउन सुगर बरामद भएको बाँके प्रहरीले जनाएको छ। दुवै जनाविरुद्ध लागूऔषध सम्बन्धी कसुरमा बाँके जिल्ला अदालतबाट १० दिनको म्याद थप गरी अनुसन्धान भइरहेको छ।

यसैगरी, जेठ ३० गते कोहलपुर नगरपालिका–११ गोलपार्कबाट दैलेख नारायण नगरपालिका–१ पुरानो बजारकी ३३ वर्षीया मनकुमारी खड्का पक्राउ परेकी छन्। उनको साथबाट २ ग्राम ५०० मिलिग्राम ब्राउन सुगर बरामद भएको प्रहरीले जनाएको छ। उनलाई अदालतबाट ७ दिनको म्याद थप गरी अनुसन्धान अघि बढाइएको छ।

उता, जेठ ३१ गते नै कोहलपुर नगरपालिका–६ शिव मन्दिर क्षेत्रमा चेकजाँचका क्रममा स्थानीय २८ वर्षीय कृष्णकुमार थारु र २२ वर्षीय प्रकाश वली पक्राउ परेका छन्। उनीहरूको साथबाट १ ग्राम २६० मिलिग्राम ब्राउन सुगर बरामद भएको प्रहरीले जनाएको छ। दुवै जनाविरुद्ध लागूऔषध सम्बन्धी कसुरमा १० दिनको म्याद थप गरी अनुसन्धान भइरहेको छ।

दुई दिनको अवधिमा कोहलपुर र बैजनाथ क्षेत्रमा ब्राउन सुगरसहित पाँच जना पक्राउ परेसँगै लागूऔषध नियन्त्रण अभियानलाई प्रहरीले थप तीव्र बनाएको जनाएको छ। बाँके प्रहरीले लागूऔषध ओसारपसार तथा कारोबारमा संलग्न व्यक्तिहरूमाथि निगरानी बढाइएको र अनुसन्धान जारी रहेको जनाएको छ।