विदेशी मुद्रासहित दुई जना विमानस्थलबाट पक्राउ

काठमाडौं।  त्रिभुवन अन्तर्राष्ट्रिय विमानस्थलको अन्तर्राष्ट्रिय प्रस्थानतर्फको ह्याण्ड ब्यागेज जाँच क्षेत्रबाट बाह्य मुलुक लैजान लागेको विभिन्न विदेशी मुद्रासहित दुई जना पक्राउ परेका छन्।

पक्राउ पर्नेहरूमा सुनसरी घर भएका ४० वर्षीय बेचन मिया र चिनियाँ नागरिक ५१ वर्षीय यो योलोङ रहेका छन्।

त्रिभुवन अन्तर्राष्ट्रिय विमानस्थल सुरक्षा कार्यालयबाट खटिएको प्रहरी टोलीले कतार एयरको उडानमार्फत काठमाडौंबाट कतार जान लागेका बेचन मियाको साथबाट ४२ हजार ४ सय कतारी रियाल फेला पारी पक्राउ गरेको हो।

त्यसैगरी, चाइना इस्टर्न एयरलाइन्सको उडानमार्फत काठमाडौंबाट चीन जान लागेका यो योलोङको साथबाट ७ हजार ५ सय अमेरिकी डलर बरामद भएपछि उनलाई पनि पक्राउ गरिएको प्रहरीले जनाएको छ।

घटनाबारे आवश्यक अनुसन्धान भइरहेको प्रहरीले जनाएको छ।