प्रहरी हुँ भन्दै धम्क्याउने पक्राउ, साथमा भेटियो वाकिटकी र प्रेस कार्ड

काठमाडौं।  आफूलाई प्रहरी भएको भन्दै सर्वसाधारणलाई धम्क्याउने एक व्यक्तिलाई प्रहरीले नियन्त्रणमा लिएको छ।

पक्राउ पर्ने व्यक्ति काठमाडौं महानगरपालिका–३ का ४७ वर्षीय शैलेश डंगोल रहेको जिल्ला प्रहरी परिसर काठमाडौंले जनाएको छ। उनलाई काठमाडौं महानगरपालिका–३२ क्षेत्रबाट पक्राउ गरिएको हो।

प्रहरीका अनुसार असार ३ गते साँझ काठमाडौं–३२ स्थित एक फुटबल मैदानमा डंगोलले आफू प्रहरी भएको दाबी गर्दै स्थानीयलाई धम्क्याएको उजुरी प्राप्त भएपछि अनुसन्धान अघि बढाइएको थियो।

कारबाहीका क्रममा प्रहरीले उनको साथबाट नवीकरण नभएको पत्रकार परिचयपत्र तथा एक सेट वाकीटकी बरामद गरेको जनाएको छ। साथै उनले प्रयोग गर्दै आएको प्रदेश–३–०१–०२३ च २५३० नम्बरको सवारी साधन पनि नियन्त्रणमा लिइएको छ।

घटनाबारे थप अनुसन्धानका लागि प्रहरी वृत्त नयाँ बानेश्वरले अदालतबाट पाँच दिनको म्याद लिएर अनुसन्धान प्रक्रिया अघि बढाइरहेको प्रहरीले जनाएको छ।