बसपार्कको होटेल मृत फेला परिन् कैलालीकी २५ वर्षीया निशा

काठमाडौँ।  नयाँ बसपार्क क्षेत्रमा रहेको एक गेस्ट हाउसबाट एक युवती मृत अवस्थामा फेला परेपछि प्रहरीले घटनाको अनुसन्धान अघि बढाएको छ।

प्रहरीका अनुसार गेस्ट हाउसको एउटा कोठाबाट दुर्गन्ध आउन थालेपछि सञ्चालकले प्रहरीलाई जानकारी गराएका थिए। त्यसपछि घटनास्थल पुगेको प्रहरी टोलीले करिब २५ वर्षीया निशा सुनुवारको शव फेला पारेको हो।

सुनुवारको स्थायी घर कैलालीको धनगढी उपमहानगरपालिका–७ रहेको र हाल काठमाडौँको माछापोखरी क्षेत्रमा बस्दै आएको प्रारम्भिक अनुसन्धानबाट खुलेको प्रहरीले जनाएको छ।

घटनाको प्रकृति हेर्दा उनको हत्या भएको हुन सक्ने आशङ्का गर्दै जिल्ला प्रहरी परिसर काठमाडौँले विस्तृत अनुसन्धान गरिरहेको छ। शवलाई पोस्टमार्टमका लागि त्रिभुवन विश्वविद्यालय शिक्षण अस्पतालमा पठाइएको प्रहरीले जनाएको छ।