साढे २ किलो बढी लागूऔषध 'पोल्यान्ड' सहित तीर्थ प्रहरीको नियन्त्रणमा

काठमाडौं । ललितपुर प्रहरीले नख्खु क्षेत्रबाट ठूलो परिमाणमा 'लागूऔषध पोल्याड' बरामद गर्दै एक जनालाई पक्राउ गरेको छ।

जिल्ला प्रहरी परिसर ललितपुरका अनुसार पक्राउ पर्ने व्यक्ति मकवानपुरको इन्द्रसरोवर गाउँपालिका–५ स्थायी घर भई हाल ललितपुर महानगरपालिका–२५ नख्खुमा बसोबास गर्दै आएका २८ वर्षीय तीर्थबहादुर ठोकर हुन्।

प्रहरीले उक्त क्षेत्रमा लागुऔषधको कारोबार भइरहेको भन्ने विशेष सूचनाका आधारमा प्रहरी वृत्त सातदोबाटोबाट सादा पोशाकमा परिचालित टोलीले उनलाई नियन्त्रणमा लिएको जनाएको छ।

खानतलासीका क्रममा ठोकरको साथबाट प्लास्टिकसहित करिब २ किलो ७९३ ग्राम 'पोल्याड' र लागुऔषध तौल गर्न प्रयोग हुने एक थान डिजिटल तराजु बरामद गरिएको ललितपुर प्रहरीले जनाएको छ।

घटनापछि पक्राउ परेका ठोकरविरुद्ध लागुऔषध सम्बन्धी कसुरमा अनुसन्धान अघि बढाइएको छ। जिल्ला अदालतबाट पाँच दिनको म्याद थप अनुमति लिएर थप अनुसन्धान भइरहेको जिल्ला प्रहरी परिसर ललितपुरले जानकारी दिएको छ।