केही दिनको अन्तरालमा पौने ४० लाखको अवैध सामान त्रिभुवन विमानस्थल प्रहरीको नियन्त्रणमा

काठमाडौं । त्रिभुवन अन्तर्राष्ट्रिय विमानस्थल सुरक्षा प्रहरीले केही दिनको अन्तरालमा पौने ४० लाख रुपैयाँ बढीको अवैध सामान बरामद गरेको छ। विमानस्थल प्रहरीले  करिब ३९ लाख ७३ हजार रुपैयाँ बराबरका अवैध विद्युतीय सामग्री र सूर्तीजन्य पदार्थ बरामद गरेको जनाएको छ।

विमानस्थल प्रहरीका अनुसार असार ३० र ३२ गते विदेशबाट आएका यात्रुको जाँचका क्रममा भन्सार छली गरी ल्याइएका १९ वटा मोबाइल, २२ वटा ल्यापटप, एक थान आइप्याड, १४ वटा भेप, ४४ वटा भेप फ्लेभर र २२ वटा भेप क्याप गरी ३७ लाख १५ हजार ६ सय रुपैयाँ बराबरका सामग्री बरामद गरी त्रिभुवन विमानस्थल भन्सार कार्यालय, गौचरमा बुझाइएको छ।

यस्तै, साउन ३ गते  कार्गो कम्प्लेक्समा ‘डग च्यु’ भनेर घोषणा गरिएको पार्सलको एक्स–रे परीक्षण गर्दा लुकाइछिपाइ अष्ट्रेलिया पठाउन लागिएको ६८ बन्डल भारतीय तथा नेपाली चुरोट फेला परेको थियो। करिब २ लाख ५७ हजार ४ सय रुपैयाँ मूल्य बराबरको उक्त सूर्तीजन्य पदार्थसहित सम्पूर्ण ३५ वटा कार्गो पोका अनुसन्धान तथा कारबाहीका लागि भन्सार कार्यालयमा बुझाइएको विमानस्थल प्रहरीले जनाएको छ।

यसअघि असार ३१ गते कार्गो जाँचका क्रममा विभिन्न प्रकारका जडीबुटीजन्य पदार्थसमेत नियन्त्रणमा लिई भन्सार कार्यालयमा बुझाइएको थियो।

विमानस्थल सुरक्षा प्रहरीले विमानस्थलमार्फत हुने भन्सार छली तथा अवैध ओसारपसार नियन्त्रणका लागि सुरक्षा निगरानी, स्क्रिनिङ र अनुसन्धानलाई थप प्रभावकारी बनाउँदै यस्ता गतिविधिविरुद्ध कडाइका साथ कारबाही जारी रहने जनाएको छ।