दाङको देउखुरीमा माटोको ढिस्कोले पुर्दा १३ वर्षीय बालकको मृत्यु

लमही । दाङको देउखुरीमा माटोको ढिस्कोले पुर्दा एक जना बालकको मृत्यु भएको छ भने सोही घटानामा परि अर्का एकजना किशोर घाइते भएका छन् ।

प्रहरीका अनुसार शनिबार राति  राजपुर गाउँपालिका–२ पिपल डाँडाका १३ बर्षीय दीपेश चौधरीको माटोको ढिस्कोले पुर्दा मृत्यु भएको हो । जिल्ला प्रहरी प्रबक्ता डीएसपी डा. हेमबहादुर केसीका अनुसार सोही घटनामा परि स्थानीय १८ बर्षीय सुमित यादव घाइते छन्। लमहीमा उनको उपचार जारी रहेको तथा उनी खतरा मुक्त रहेको डीएसपी केसीले जानकारी दिए ।

डीएसपी केसीका अनुसार स्थानीय चालक २८ बर्षीय रामप्रताप यादवलाई प्रहरीले मध्य राति नियन्त्रणमा लिएको थियो ।

चालक यदाव शनिबार राति ९ बजेतिर बेलास्थित दुर्गा सामुदायिक वन भित्र दुई बालकलाई साथमा लगेर ट्याक्टरबाट माटो चोरी निकासी गर्न गएको भन्ने खुलेको प्रहरीले जनाएको छ ।

इलाका प्रहरी कार्यालय गढवाले आज बिहान घटनास्थल पुगेर थप अनुसन्धान सुरु गरेको दाङ प्रहरीले जनाएको छ।