आइफोन विवादमा १७ वर्षीय लजिन थापाको हत्या, चार जना पक्राउ

काठमाडौं । जन्मदिनको भोजमा सहभागी हुन गएका १७ वर्षीय युवक लजिन थापाको आइफोनको विषयमा भएको विवादपछि हत्या भएको खुलेको छ। बागलुङको बडिगाड गाउँपालिका–१ का लजिनको हत्या घटनामा संलग्न रहेको आरोपमा प्रहरीले चार जनालाई पक्राउ गरी थप अनुसन्धान अघि बढाएको छ।

नेपाल प्रहरीका अनुसार लजिन साउन १ गते राति साथी असिम वनको जन्मदिन मनाउन दगातुन्डाँडा प्राथमिक विद्यालय पुगेका थिए। त्यहाँ उनीसहित सात जना साथी भेला भई राति अबेरसम्म मादक पदार्थ सेवन गरेका थिए। कार्यक्रम सकिएपछि लजिन घर नफर्किएपछि परिवारले खोजी थालेको थियो।

साउन २ गते परिवारले इलाका प्रहरी कार्यालय गलकोटमा बेपत्ताको निवेदन दिएपछि प्रहरीले गण्डकी प्रदेश प्रहरी कार्यालयको प्राविधिक टोलीको सहयोगमा खोजी तथा अनुसन्धान सुरु गरेको थियो। अनुसन्धानका क्रममा प्राविधिक विश्लेषण, पोलिग्राफ परीक्षण, तालिमप्राप्त कुकुर, ड्रोन क्यामेरा तथा स्थानीयवासीको सहयोगमा सम्भावित क्षेत्रको व्यापक खोजी गरिएको थियो।

निरन्तर खोजतलासका क्रममा साउन ९ गते बिहान बडिगाड गाउँपालिका–१ स्थित मनखोलाको खोल्सामा लजिनको शव फेला परेको प्रहरीले जनाएको छ। शवलाई पोस्टमार्टमका लागि धौलागिरी प्रादेशिक अस्पताल, बागलुङ पठाइएको छ।

प्रहरीको प्रारम्भिक अनुसन्धानअनुसार जन्मदिन मनाउने क्रममा आइफोनको विषयलाई लिएर विवाद भएको र त्यसपछि भएको कुटपिटका कारण लजिनको मृत्यु भएको देखिएको छ। घटनामा संलग्न रहेको आरोपमा सुदीप विक, रेमबहादुर विक, ददी परियार र असिम वनलाई पक्राउ गरिएको प्रहरीले जनाएको छ।

प्रहरीले सुरुमा बेपत्ता व्यक्तिको घटनाका रूपमा अनुसन्धान थाले पनि शव फेला परेपछि घटनालाई हत्या मुद्दामा केन्द्रित गरी अनुसन्धान अघि बढाएको जनाएको छ। घटनामा अन्य व्यक्तिको संलग्नता, कुटपिटको वास्तविक कारण, शव खोल्सासम्म कसरी पुर्‍याइयो तथा प्रमाण लुकाउने प्रयास भए–नभएको विषयमा समेत अनुसन्धान जारी रहेको प्रहरीले जनाएको छ।