यी प्रहरी कर्मचारीको यसकारण जान सक्छ जागिर!

काठमाडौं । नेपाल प्रहरीका ११ जना कर्मचारी लामो समयदेखि आफूखुसी ड्युटीमा अनुपस्थित भएपछि प्रहरी प्रधान कार्यालय, नक्सालले सार्वजनिक सूचना जारी गर्दै सात दिनभित्र सम्पर्कमा आउन निर्देशन दिएको छ।

सोमबार जारी सूचनाअनुसार सम्बन्धित कर्मचारीलाई बाटोको म्यादबाहेक सात दिनभित्र अनुपस्थित हुनुको कारण खुलाउँदै सन्तोषजनक स्पष्टीकरणसहित कार्यालयमा हाजिर हुन भनिएको छ। यसअघि खोजतलास तथा कार्यालयमार्फत सूचना जारी गरिए पनि उनीहरू सम्पर्कमा नआएको प्रहरी प्रधान कार्यालयले जनाएको छ।

प्रहरी नियमावली, २०७१ अनुसार तोकिएको समयभित्र उपस्थित नभए विभागीय कारबाही प्रक्रिया अघि बढाइने र सेवाबाट हटाइने चेतावनीसमेत दिइएको छ। प्रधान कार्यालयका अनुसार सार्वजनिक सूचनामार्फत सम्बन्धित कर्मचारीलाई सफाइ पेश गर्ने अन्तिम अवसर प्रदान गरिएको हो।

सम्पर्कविहीन हुनेमा दुई जना प्रहरी सहायक निरीक्षक छन्। उनीहरू काठमाडौं उपत्यका प्रहरी कार्यालय, रानीपोखरीका तीर्थबहादुर बुढा र इलाका प्रहरी कार्यालय, लेकबेसी (सुर्खेत) का दुर्गाराज मल्ल हुन्।

यस्तै, प्रहरी जवान नागेश्वर यादव, सुबोधप्रसाद पटेल, देवकृष्ण राउत, जयन्ती थापामगर, सञ्जय परियार, गीता मेदासी, राजकुमार रावत, ध्रुवराज पाध्या तथा प्रहरी कार्यालय सहयोगी सुरेश कुमाल पनि लामो समयदेखि सम्पर्कविहीन रहेको प्रहरी प्रधान कार्यालयले जनाएको छ।