सिक्री लुटेर भागेका कर्माले प्रहरीमाथि खुकुरी प्रहार गरेपछि! अनि प्रहरीले चलायो गोली

काठमाडौं। सिक्री लुटपाट गरेर भागेका आरोपितमाथि प्रहरीले गोली हानेर पक्राउ गरेको छ।

काठमाडौंको बुढानीलकण्ठ नगरपालिका–१३, चुनिखेल क्षेत्रमा सिक्री लुटपाट गरी फरार रहेका आरोपित कर्मा तामाङलाई प्रहरीले गोली प्रहार गरी पक्राउ गरेको जनाएको छ।

प्रहरी प्रधान कार्यालयका अनुसार साउन १६ गते राति करिब १०:२५ बजे तामाङलाई पक्राउ गर्ने क्रममा उनले साथमा रहेको खुकुरी प्रहार गरी प्रहरीमाथि आक्रमण गर्ने प्रयास गरेका थिए।

त्यसपछि आत्मरक्षाका लागि प्रहरीले तीन राउण्ड गोली प्रहार गरेको  प्रहरी प्रधान कार्यालयले जनाएको छ।

गोली लागेर घाइते भएका तामाङलाई नियन्त्रणमा लिइएको प्रहरीले जनाएको छ। उनको साथबाट घटनामा प्रयोग भएको खुकुरीसमेत बरामद गरिएको छ।

हाल तामाङको काठमाडौंस्थित ट्रमा सेन्टरमा उपचार भइरहेको छ। घटनाबारे थप अनुसन्धान भइरहेको प्रहरी प्रधान कार्यालयले जनाएको छ।