लागूऔषध कारोबारको नयाँ तरिका बिफल पार्दै ब्यूरो, यसरी गरिन्थ्यो हेरोइनको बिक्री

काठमाडौं । लागूऔषध नियन्त्रण ब्युरोले प्रविधिको प्रयोग गर्दै राइड सेयरिङ 'इनड्राइभ'मार्फत  लागूऔषध (खैरो हेरोइन) ओसारपसार तथा बिक्री–वितरण गर्ने गिरोहका तीन जनालाई पक्राउ गरेको छ।

ब्युरोका अनुसार भुनिएको बोराभित्र लागूऔषध लुकाई सर्वसाधारण बस चढेर काठमाडौं ल्याउने र त्यसपछि मोटरसाइकलमार्फत निगरानी गर्दै इनड्राइभ प्रयोग गरी ग्राहकसम्म लागूऔषध पुर्‍याउने गरेको सूचनाका आधारमा अनुसन्धान अघि बढाइएको थियो।

अनुसन्धानका क्रममा लागूऔषध माग गर्ने व्यक्तिलाई इनड्राइभ मार्फत रकम पठाउन लगाई रकम प्राप्त भएपछि अर्को इनड्राइभ बुक गरेर लागूऔषध डेलिभरी गर्ने गरेको खुलेको प्रहरीले जनाएको छ।

सोही क्रममा गत साउन १४ गते काठमाडौंको गोंगबु मित्रनगर क्षेत्रमा ब्राउन हेरोइन बिक्री–वितरण गर्न आएका तीन जनालाई पक्राउ गरिएको हो। पक्राउ परेकामध्ये ओखलढुंगाको लिखु गाउँपालिका–७ का २८ वर्षीय हितबहादुर बस्नेत, सप्तरीको राजगढ गाउँपालिका–७ का १९ वर्षीय रामकृष्ण शर्मा तथा धनुषाको जनकन्दनी गाउँपालिका–३० का २१ वर्षीय धनञ्जय पायवान रहेका छन्।

प्रहरीले उनीहरूको साथबाट ४३ ग्राम ब्राउन हेरोइन, दुई थान डिजिटल तराजु, ११ थान मोबाइल फोन र नगद ५० हजार रुपैयाँ बरामद गरेको जनाएको छ।

ब्युरोका अनुसार पक्राउ परेका हितबहादुर बस्नेतले स्कुल बस चालकको काम गर्दै आएका थिए भने धनञ्जय पायवान आईटी इन्जिनियरिङ अध्ययनरत रहेका छन्।

प्रारम्भिक अनुसन्धानबाट लागूऔषध खरिदकर्ता र विक्रेताबीच पाँच पटकसम्म कारोबार हुँदा पनि उनीहरू प्रत्यक्ष रूपमा आमनेसामने नभएको खुलेको प्रहरीले जनाएको छ। घटनाबारे थप अनुसन्धान भइरहेको लागूऔषध नियन्त्रण ब्युरोले जनाएको छ।