वैदेशिक रोजगारीमा पठाइदिने भन्दै ६५ लाख ठगी, चार जना पक्राउ

काठमाडौं । वैदेशिक रोजगारीमा आकर्षक तलबको प्रलोभन देखाउँदै विभिन्न देश पठाइदिने भन्दै रकम ठगी गरेको आरोपमा प्रहरीले चार जनालाई पक्राउ गरेको छ।

पक्राउ पर्नेमा काठमाडौं महानगरपालिका–२८ बस्ने रौतहटका ४६ वर्षीय एम।डी। खुर्सिद आलम नेपाली, ललितपुरको गोदावरी नगरपालिका–२ बस्ने नवलपरासी पश्चिमका ३३ वर्षीय भुप नारायण चौधरी, ललितपुरको महालक्ष्मी नगरपालिका–८ बस्ने सिराहाका ३४ वर्षीय बसन्त कुमार सिंह र काठमाडौंको बुढानिलकण्ठ नगरपालिका–९ बस्ने संखुवासभाका ४२ वर्षीय रस्तमान राई रहेका छन्।

प्रहरीका अनुसार एम।डी। खुर्सिद आलमले ग्रीस पठाइदिने भन्दै एक जना पीडितबाट ८ लाख रुपैयाँ, भुप नारायण चौधरीले जर्मनी पठाइदिने भन्दै तीन जना पीडितबाट ३२ लाख रुपैयाँ, बसन्त कुमार सिंहले युएई पठाइदिने भन्दै ११ जना पीडितबाट २१ लाख रुपैयाँ र रस्तमान राईले बेलायत पठाइदिने भन्दै एक जना पीडितबाट ४ लाख रुपैयाँ लिएका थिए।

रकम लिएपछि उनीहरू सम्पर्कविहीन भएको भन्दै पीडितहरूले दिएको उजुरीका आधारमा काठमाडौं उपत्यका अपराध अनुसन्धान कार्यालय, टेकुबाट खटिएको प्रहरीले उनीहरूलाई विभिन्न स्थानबाट पक्राउ गरेको हो।

प्रहरीले एम।डी। खुर्सिद आलमलाई काठमाडौं महानगरपालिका–२८ र भुप नारायण चौधरीलाई काठमाडौं महानगरपालिका–२ बाट पक्राउ गरेको जनाएको छ। त्यसैगरी बसन्त कुमार सिंहलाई ललितपुरको महालक्ष्मी नगरपालिका–५ तथा रस्तमान राईलाई ललितपुर महानगरपालिका–८ बाट पक्राउ गरिएको हो।

पक्राउ परेका चारै जनालाई आवश्यक अनुसन्धान तथा कारबाहीका लागि वैदेशिक रोजगार विभाग, ताहाचल, काठमाडौं पठाइएको प्रहरीले जनाएको छ।