मेलाबाट फर्किँदै गरेको ट्र्याक्टर दुर्घटना, १४ वर्षीय बालकको मृत्यु, ३३ घाइते

खोटाङ । दिक्तेल रुपाकोट मझुवागढी नगरपालिका–२ छेपेखोलास्थित मध्यपहाडी लोकमार्गमा ट्र्याक्टर दुर्घटना हुँदा एक जनाको मृत्यु भएको छ भने ३३ जना घाइते भएका छन्।

भुलभुलेबाट दिक्तेलतर्फ आउँदै गरेको ना.५ त ४५५५ नम्बरको ट्र्याक्टर आफैँ अनियन्त्रित भई दुर्घटनामा परेको जिल्ला प्रहरी कार्यालय खोटाङले जनाएको छ। ट्र्याक्टरमा सवार तथा मेला हेर्न जाँदै गरेका मानिसहरू दुर्घटनामा परेका हुन्।

दुर्घटनामा गम्भीर घाइते भएका दिक्तेल रुपाकोट मझुवागढी नगरपालिका–५ का १४ वर्षीय दिवश परियारको उपचारका लागि लैजाँदै गर्दा बाटोमै मृत्यु भएको प्रहरीले जनाएको छ।

दुर्घटनामा घाइते भएका ३३ जनामध्ये १९ जनालाई थप उपचारका लागि काठमाडौंस्थित केएमसी अस्पताल पठाइएको छ। उनीहरूमध्ये केहीको अवस्था गम्भीर र अधिकांशको अवस्था मध्यम रहेको छ। बाँकी १४ जना घाइतेलाई स्थानीय स्वास्थ्य संस्थामा उपचारपछि डिस्चार्ज गरिएको प्रहरीले जनाएको छ।

थप उपचारका लागि काठमाडौं पठाइएका घाइतेहरूमा दिक्तेल रुपाकोट मझुवागढी नगरपालिका–५ लफ्याङका ४५ वर्षीय सबिन तिरुवा र ९ वर्षीय योनिस विकको अवस्था गम्भीर रहेको छ। त्यस्तै ३५ वर्षीया बिमला विक, ३० वर्षीय लिला श्रेष्ठ, ५७ वर्षीया लुलादेवी विक, ५० वर्षीय राजन विक, ५१ वर्षीय रामबहादुर विक, ३४ वर्षीय सिताराम विक, १८ वर्षीय मन्दिप तिरुवा, २३ वर्षीय नबिन परियार, १२ वर्षीय न्युकेश तिरुवा, ३५ वर्षीय बुडिराम विक, २१ वर्षीया मनिका परियार, ४० वर्षीया बिना परियार, १४ वर्षीया दिपसना परियार, १८ वर्षीया निशा परियार, १७ वर्षीया चन्द्रकला विक, १७ वर्षीय प्रबिन विक र १६ वर्षीय युकेश तिरुवा घाइते भएका छन्।

उनीहरू सबैको शरीरका विभिन्न भागमा चोट लागेको र अधिकांशको अवस्था मध्यम रहेको प्रहरीले जनाएको छ।

दुर्घटनामा संलग्न ट्र्याक्टर घटनास्थलमै रहेको छ भने त्यसलाई उठाउने पहल भइरहेको प्रहरीले जनाएको छ। ट्र्याक्टर चालक ओखलढुंगाको सिद्धिचरण नगरपालिका–७ का २३ वर्षीय रिनिमा शेर्पालाई प्रहरीले नियन्त्रणमा लिएको छ। दुर्घटनाबारे थप अनुसन्धान भइरहेको जिल्ला प्रहरी कार्यालय खोटाङले जनाएको छ।