भोटेकोशीमा फेरि बाढी बढ्यो, खोज तथा उद्धारमा खटिएका र नागरिकलाई सतर्क रहन आग्रह

काठमाडौँ । रसुवास्थित भोटेकोशी नदीमा आइतबार बिहानदेखि पानीको बहाव पुनः बढेपछि सरोकारवाला निकायले सतर्कता अपनाउन आग्रह गरेका छन्।

भदौ १० गते तिब्बततर्फबाट आएको बाढीमा परेकाहरूको खोजी तथा उद्धार कार्य जारी रहेकै अवस्थामा नदीमा पानीको बहाव बढेपछि उद्धार तथा राहतमा खटिएका टोलीसहित तटीय क्षेत्रमा रहेका नागरिकलाई सावधानी अपनाउन भनिएको हो।

राष्ट्रिय विपद् जोखिम न्यूनीकरण तथा व्यवस्थापन प्राधिकरणले सूचना जारी गर्दै रसुवा, नुवाकोट, धादिङ र चितवनलगायत प्रभावित क्षेत्रमा खोज, उद्धार तथा राहतमा परिचालित सबैलाई विशेष सतर्कता अपनाउन अनुरोध गरेको छ।

बाढी पूर्वानुमान महाशाखाका अनुसार धादिङस्थित त्रिशूली नदीमा जलसतह खतराको तहभन्दा करिब तीन मिटर माथि पुगेको छ। रसुवाको भोटेकोशी क्षेत्रमा आएको बाढीका कारण त्रिशूलीमा समेत पानीको सतह बढेको जनाइएको छ।

यसैबीच, गण्डकी प्रदेशका विभिन्न जलाधार क्षेत्रमा भारी वर्षा भइरहेको महाशाखाले जनाएको छ। भारी वर्षाका कारण नारायणी नदी तथा यसका सहायक नदीहरूमा समेत जलसतह थप बढ्न सक्ने भएकाले नदी आसपास र तटीय क्षेत्रमा रहेका नागरिकलाई सावधानी अपनाउन आग्रह गरिएको छ।