नेपालगन्जबाट ३५ ग्रामबढी खैरो हेरोइनसहित दुई जना पक्राउ

नेपालगन्ज । बाँकेको नेपालगन्ज उपमहानगरपालिका–३ एकलाइनेबाट ३५ ग्राम ९ सय मिलिग्राम खैरो हेरोइनसहित दुई जना पक्राउ परेका छन्।

लागूऔषध नियन्त्रण ब्यूरो शाखा कार्यालय नेपालगन्जका अनुसार विशेष सुराकीका आधारमा खटिएको टोलीले शनिबार दिउँसो ३ः४५ बजे नेपालगन्ज–३ स्थित एक घरमा कानुनबमोजिम खानतलासी गरेको थियो।

खानतलासीका क्रममा घर तथा शरीरबाट ३५ ग्राम ९ सय मिलिग्राम खैरो हेरोइन बरामद भएको हो। उनीहरूको साथबाट पाँच थान मोबाइल, नेपाली नगद ७३ हजार ७ सय रुपैयाँ र डिजिटल तराजु एक थानसमेत बरामद गरिएको ब्यूरोले जनाएको छ।

पक्राउ पर्नेमा नेपालगञ्ज–३ का ३२ वर्षीय मोहम्मद हसीन अन्सारी र सोही ठाउँका २५ वर्षीय समीर अहमद अन्सारी रहेका छन्।

बरामद लागूऔषध तथा अन्य सामग्रीसहित दुवै जनालाई थप अनुसन्धानका लागि जिल्ला प्रहरी कार्यालय बाँकेमा बुझाइएको लागूऔषध नियन्त्रण ब्यूरो शाखा कार्यालय नेपालगञ्जले जनाएको छ।